Hakha um Kawl Ralkap LIB 268 phu i senthum ralkap Tin Lian Biak (ralkap number 401761) a zaam, CDM a tuah.
A chungkhar minung Kawl Ralkap nih an tlaih hna, tiah CHRO nih a thanh.
A nupi le an fale cu an zaam manh nain, a nulepa le unau pawl an tlaih hna.
Sgt. Tin Lian Biak hi Nitlakchaklei Kawl Ralkap bawi Brig-Gen Myo Htut Hlaing ni fatin a cawlcanghnak cazin tlaitu asi.
Hakha Kawl Ralkap nih CNF le CDF doh dan simanking an suaimi biathli pawl aa zaampi khawh caah CNF le CDF caah santlai kho men.
Amah sinah Kawl Ralkap tatta Van Hmun Thup a zaam ve. Anih hi ralkap pehtlaihnak lei rian a tlaitu phu chungtel asi. Cun, Hakha um Raltuknak Simanking Suaitu ralkap bawi tumtlang pawl motor mongtu zong asi chih.
Nihin Laitlang thawngpang dang rel awk
1. Falam peng ah Kawl Ralkap motor 55 khat in an hung kai. Nizaan kha Falam peng Lumbang khua Taang 10 Sianginn ah an riak.
A zaammi Kawl ralkap pawl nih, “Mah vialte ralkap hi CNF headquarters chuh dingin a rami an si,” tiah an chim.
A ra laimi ni tlawmpal ah CNF sakhan an kah khawh men caah pawngkam khuate vialte lungvar tein um kan hau.
Anmah 2 nih cun, “Kawl Ralkap a niam bikin a bawibik tiang an nupi vialte zong meithal an tlaihter dih cang hna. Ralkap a si lomi SAC cozah chungtel an nupi le vialte zong meithal an tlaihter dih cang hna,” tiah an phuan.
“Kawl Ralkap le SAC chungtel pawl cu an lungrethei tuk cang i an cungbawi nawlpekmi zong an zul duh tuk ti hna lo,” tiah an phuan chap. Mah hi hmet law tling tein relchap khawh asi.
2. Pakokku khua (Magway ramṭhen) in Kawl Ralkap motor 88 khat in Mindat khua lei ah an hung kai thluahmah.
Tu zingka 5am hrawngah Magway ramṭhen Pakokku khua in Chin ramkulh Mindat khua lei ah Kawl Ralkap tank le motor 88 hrawng in an hung kai thluahmah.
Tu zingka 8:15am hrawngah ralkap motor le tank 88 cu Pakokku le Pauk khua kar an phan.
9:10am hrawngah Pauk khua an tan. 9:15am ah Pauk le Mindat khua kar lamṭhen an phan i mi an check len hna.
9:25am ah Mindat khua um Kawl Ralkap pawl motor 1 khat in an i cit i an va don hna.
Mah lio cun, Kyaukhtu khua (Magway ramṭhen) in ral tuknak tank motor 2 cu Laitlang an hung kai thluahmah ve i an va don ve hna.
Lam ah CDF le CNF nih bomb an hmenhmi um kho men tiah bomb hmenhmi kawl pah in duhsah tein Mindat lei an hung kai thluahmah.
Mindat khua chung zongah biatak tein minung an check thluahmah cang hna. Mindat peng Ṭhinchaung khuate le Sankhua khuate karlak zongak Kawl Ralkap 60 leng umhmun an khuar.
Mindat le Matupi kar meng tung 70 pawng zongah Kawl Ralkap pawl nih mi an check hna i king an congh.
Mah hi hmet law tling tein ralchap khawh asi.
