Wednesday, December 1, 2021

Bill Gates nih ‘mah 3’ a thiammi hi cu hmailei ah rian tha an hmu kho lai ati

Vawlei cung mirumbik 4nak a simi Bill Gates cu hmailei kong lawngte ah a buai khim ko.

Thil thar sertu le sipuaizi thlengtu pawl he rian a ṭuanṭi lengmang, cun hmailei minung khuasaktintuknak kong cauk a rel peng. Mipi caah thilṭha a chuah tertu ding rian pawl zongah tangka a hlut.

Mah vialte a tuahmi charhchan in hmailei kong a chimmi cu, mah 3: Science, Engineering le Sipuaizi a thiammi pawl cu hmailei ah herh bikmi an si te lai, ati.

Mah 3 a thiammi pawl nih hin minung khuasaktintuknak, sipuaizi, tbk zeizong vialte an thlen dihte lai, tiah LinkedIn Executive Editor Daniel Roth sinah a chim.

“Hmailei rian tampi cu science, math le economic thiam a herhmi an si te lai tiah ka ruah.

“Coding le periodic table na thiam tuk lo hmanh ah, a thiam taktakmi pawl nih zeitin dah khua an ruah ti hrawnghran a ruat kho na si ahcun, mahte hmanh nih cun hmailei ah an bawmh tuk lai,” ati.

Kawlram ahcun cathiam tampi nih ‘sipuaizi (economic/bawkah)’ hi an cawng duh lo. Science bataṭuai Biology lawngte an cawng. Ramdang ahcun sipuaizi (BBA, MBA, Accounting, Commerce) degree a hmumi pawl hi an herh tuk hna. Kawlram zong a ṭhancho ahcun mah degree a lami pawl caah rian a tampi te lai.

Biology (Science bataṭuai) a ṭha lo ka tinak si lo. A ṭha tuk ko. Bill Gates nih a chimmi Science, Engineering le Math khi Kawlram ahcun Biology (science bataṭuai) asi.

Nain, cathiam pawl nih bawkah an lak duh lomi, a niam tukin an hmuhmi hi a dik deuh lo. Ramdang zongah cathiam tampi cu science bataṭuai (Science, Technology, Engineering, Math silole a tawinak in STEM) an la ko nain, cathiam pipi sipuaizi a lami an tampi ve.

Atu lio cun, coding (Software engineering, programming, tbk) Accounting, Marketing, Finance, Economics, tbk degree a hmumi pawl caah rian ṭha hmuh le rum a fawi cem.

- Advertisement -