US President Joe Biden nih, “Keimah president ka ṭuan chung paoh cu China hi US lonh in vawlei cung ram ṭhawngbik asi kho lai lo,” tiah a chim.
Nain, nizaan kha president a ṭuan hnu in avoi khatnak bik media sin thawngthanhnak a tuah i China chuak thilri pawl tax khinh/lo le phihkham/lo kong a chim duh lo.
President Biden nih, “China nih biatak tein US a kan zuammi ka hmuh. Chawva in siseh, ralkap thazaang in siseh, zei lei paoh in vawlei cungah a rumbik le a ṭhawngbikmi ram si aa tinh. Keimah president ka ṭuan chung paoh cu asi kho lai lo, aruang cu US hi a ṭhangcho chin lengmang lai i a lianngan chin lengmang lai,” tiah a chim.
China Ramdang Vuanci Zung biachimtu Hua Chunying nih, “US le China kan i zuamnak hi a dikfelmi le a ngandammi si a herh. China nih kan i tinhmi cu US lonh khi asi lo. Kan hlawhtlin cangmi vialte lonh in ṭhancho chin lengmang ding tu khi si,” tiah a chim.
China cu atu lio hi vawlei cung chawlehnak ṭhawngbik 2nak, US changtu asi. Hiti ningin a ṭhancho peng ko ahcun kum tlawmpal ah US lonh in vawlei cung chawlehnak ṭhawngbik (rumbik) le ralkap thazaang ṭhawngbik, vawlei cungah thil ti kho bik ram ah aa chuah lai, tiah thiamsang tampi nih an ruahdamh.
US Ramdang Vuanci Pu Antony Blinken, Ram Himnak Ruahnak Petu Pu Jake Sullivan (Biden acozah) le China cozah palai pawl cu naite ahkhan US ram Alaska state ah nuhrin covo le ram himnak kong meeting an tuah. Biden nih president a ṭuan hnu in avoi khatnak bik China cozah he meeting an tuah si.
Pu Blinken nih, “Meeting kan tuah lio ahcun China nih Xinjiang, Taiwan le Hong Kong harnak a pekmi hna kong le internet/computer himnak kong kan ceih,” tiah a chim.
