17.5 C
Hakha
Thursday, January 21, 2021

COVID-19

Vawleipumpi
97,310,103
A zawmi
Updated on January 21, 2021 6:28 am
Vawleipumpi
2,083,337
A thimi
Updated on January 21, 2021 6:28 am
Vawleipumpi
69,632,245
A dammi
Updated on January 21, 2021 6:28 am

Biden nih ‘President Sinak caah a Herhmi Thimtu Upa Vote’ Official Tein Ngah Cang

Advertisement

US President sinak caah cun Thimtu Upa (Electoral College) vote 270 ngah a herh. Biden nih official tein thimtu upa vote 270 leng a ngah cang.

Tuni ah California state Thimnak Zung nih “Biden nih a tei” tiin official certificate a chuah. Cucaah an state um thimtu upa 55 nih an dihlak in Biden vote an pek hau cang.

State dang tampi zong nih “Biden nih a tei” tiin official certificate an chuah cang. Atutiang ah “Biden nih a tei” tiin official certificate a chuah cangmi state pawl ahhin thimtu upa 279 an um, cucaah Biden nih official tein thimtu upa vote 279 a ngah cang ti khawh asi.

Thimnak ah hi bantuk tete hi zapi zaraan nih ruah a rak si theng bal lo nain, tutan cu Donald Trump nih a sunghmi a cohlang duh lo i state tampi ah Biden sunghter dingin tazacuainak a tuah caah hopaoh nih ahlei in ngiat cio a hung si.

Ohio State University ah law professor a ṭuanmi Pu Edward Foley nih, “Biden nih a tei ti cu liamcia zarh tampi lio khan hngalh cio asi cang ko nain, atu bantukin official tein thimtu upa vote 270 leng a ngahmi hi president inn White House luhnak caah dot khatnak asi,” tiah a chim.

“Upadi ning tein teinak a hmuh hmasa cemmi asi. Mah hlan ah Biden nih a tei timi kha cu ruahdamh (projection) lawng an si,” tiah a chimchap.

US rampumpi ah thimtu upa 538 an um. December 14 ah an state cio mipi aiawh in vote an thlak lai.

US phunghram ningah, state pakhat i thimtu upa pawl nih anmah duhmi paoh vote pek a ngah lo, an state mipi nih an thimmi kha vote pek dih asi.

Tahchunnak ah, California state mipi nih Biden an thim caah an state thimtu upa 55 nih December 14 ah Biden an vote dih hau. Texas state mipi nih Trump an thim caah an state thimtu upa 38 nih Trump an vote dih hau ve.

Thimtu upa pawl nih December 14 ah vote an thlakmi cu January 6 ah Rampumpi Hluttaw (Congress, Myanmar cun Pyidaungsu Hluttaw) nih a zohfel lai i a fehter te lai.

Thimtu upa vote pawl cu Hluttaw MP (representative le senator) pawl nih cohlan lonak nawl an ngei nain, Biden sungh tiangin cohlan lo ding cu zeiti hmanh in asi thiam ti lo ti khawh asi.

“January 20 ah Biden nih President ṭuan a thok lai ti cu al awk um ti lo,” tiah law professor Pu Foley nih a chim.

Theihternak: The Chin Express cu kan Chin miphun caah rinhtlak thawngpang dik thanh aa zuam pengmi kan si. Kanmah pumpak ṭanh/lo ruangah thawngpang merh aa timmi kan si lo. Trump uar ruangah Trump nih a tei ding bantukin ṭial a hmangmi le Biden ṭanh ruangah Biden nih a tei ding bantukin ṭial a hmangmi kan si lo. Thil sining kha a sining tein ṭial aa zuammi kan si.

- Advertisement -

Bawmh Khawh Kan Si

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan rianṭuannak ah bawmh a kan duhmi nan um cun, thla 1 $5 tein bawmh khawh kan si.

Ṭial Tharmi

Ṭial Tharmi

COVID-19

Vawleipumpi
97,310,103
A zawmi
Updated on January 21, 2021 6:28 am
Vawleipumpi
2,083,337
A thimi
Updated on January 21, 2021 6:28 am
Vawleipumpi
69,632,245
A dammi
Updated on January 21, 2021 6:28 am
- Advertisement -