Australia: Victoria ah COVID-19 zawtnak ngei 8 an hmuh hna caah ni 7 chung an lockdown lai

- Advertisement -

Australia ram Chinmi tambiknak Victoria state cu tuni ah COVID-19 zawtnak ngei 8 te an hmuh hna caah, “Tu zaan 8pm thokin kan state pumpi ni 7 chung kan lockdown lai,” tiah State Cozah hruaitu Pu Daniel Andrews (hmanthlak) nih tu zaanlei ah thawngthanh.

Pulrai aa thawknak in tutan hi Victoria state voi 8nak lockdown an tuah asi cang lai.

Tu zaan 8pm in aa thok ding ni 7 chung lockdown chung khapmi le zulhphung cu kan hnu zarh ah a dongmi a donghnak bik lockdown lio he khan aa khat dih ko lai.

Pu Daniel Andrews nih, “Kan state ah COVID-19 mizaw he aa pehtlai bak lomi zawtnak an ngeih ahcun lockdown dah lo cun zeihmanh tuah awk dang um lo,” ati.

“Lockdown kan tuah colh lo ahcun a karh viar lai. A karh cang hnu ahcun, zorter cu chim hlah a karhmi hmanh kan tlangtlak kho lai lo. Mah zawtnak hi a karh rang tuk.

Christmas tiang kan lockdown khawh men

“Zawtnak a karhmi hi rianrang tein kan kham khawh lo ahcun, kan state mipi 80% tal raikhamsi an i chunh dih hlan lo, Christmas tiang lockdown tuah kan hau te kho men.

“Raikhamsi aa chunmi an tlawm tuk rih caah lockdown tuah lo cun zeitin hmanh asi kho lo. Mipi raikhamsi an i chunh hnu cun, lockdown loin a dang tampi tuah khawh asi te ko lai,” ati.

Victoria state ah tu zingka ah COVID-19 zawtnak ngei 6 an hmuh hna. Tu zaanlei ah 2 an hmuh chap hna. Zaanlei ah hmuhmi 2 hi cu thaizing Ningani cazin ah an telh te hna lai.

Zawtnak ngei minung 5 hi mizaw he aa pehtlai bak lomi an si i khuazei in dah zawtnak an i lak ti hngalh khawh asi lo.

Zawtnak ngeimi pa pakhat cu Melbourne khua nitlak-chaklei Maribyrnong sang ah ummi kum 20 hrawng asi. NSW state in a hung kirmi a chungkhat pawl he an i pehtlaih/lo nawlngeitu nih an hlat lio asi.

Zawtnak ngei vemi nuva hna cu Hobsons Bay khuapi (Melbourne pawng) ummi an si i Al-Taqwa College ah cachimmi an si. Chungkhar dang minung 2 zong an chawnh cang hna. An chawnhmi hna chungkhar cu minung 5 an si nain adang cu an chawn manh rih hna lo.

Al-Taqwa College siangngakchia le rianṭuantu 2,494 telh in minung 3,000 hrawng cu leng chuak loin inn chungah i erh dingin cozah nih nawl a pek cang hna.

Al-Taqwa College ah cachimmi Hobsons Bay khuami a siangngakchia 300 hrawng zong amah pawng an um caah cozah nih a test thluahmah hna lio asi.

Al-Taqwa College siangngakchia le saya/ma pawl cu tuni hi an sianginn ah rianrang in Pfizer raikhamsi an chunh cuahmah hna. — The Guardian

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...