Ramleng a chuak bak lomi Australia rammi pakhat sinah avoi 1nk bik ‘Omicron’ timi COVID-19 hrik thar kan hmuh, tiah Australia cozah nih tuni ah thawngthanh.
Sydney khua ah sianginn a kai liomi ngakchia pakhat sinah an hmuh hi asi. Cucaah, Omicron hi kan khua le sang chungah a karh cang tinak asi, ati.
“Kan sang chungah a karh cu thinphang asi bak ko, nain thil hi phun tampi ruah chih peng a hau. Kan pawcawmnak rian ṭuan le sipuaizi phih colh awk a ṭha rih lo,” tiah NSW Ngandamnak Vuanci nih a chim.
“Atutiang vawlei cung thiamsang vialte nih hlatlainak an tuahmi ah, mah hrik thar hi hmasa hrik pawl (Delta le adang pawl) tlukin harnak a kan pek hrimhrim ko lai timi tatte pakhat hmanh a um rih lo,” ati.
Atutiang ahhin Australia ram ah minung 9 sinah Omicron an hmuh cang. 8 cu minung tambiknak state New South Wales lawngte ah an hmuh hna.
Mah ruangah, “ramdangmi vialte Australia tlawnnak nawl ka pek hna lai….” tiin Australia rampumpi cozah nih thawng a thanh cangmi zong zarh 2 a thawn i ‘December 15 tiang paoh cu ramri kan phih rih lai’ tiin thawng a thanh ṭhan.
Visa a ngahnak kum 1 leng asi cangmi Malaysia um Chinmi tampi nih ‘Christmas lai ahcun Australia kan kal kho men lai’ tiah hnabeisei ngai in an hngahmi cu pakpalawng bantuk ah a cang ṭhan. Nain, chungkhar (nu/pa fa, unau, nupi/va), tbk cu kal khawh asi ko. Chungkhat pawl (ni/ṭang, tu, cousin, tbk) pawl cu ngah lo.
November thla ah student visa a pekmi vialte zong naite ahkhan a leet/thawn dih hna. Cheukhat cu vanlawngtual hna in an kir.
Australia Rampumpi Ngandamnak Lutlai Paul Kelly nih, “Raikhamsi nih Omicron a kham khawh/lo zong hohmanh nih hngalh asi rih lo caah avoi 3nk raikhamsi chunh cu atu lawlawse cu tha kan pe rih lo,” ati.
Australia ram cu zawtnak ngei tlawmte an hmuh hna cangka in fak chiahru in lockdown an rak tuah colh lengmang caah ramdang pawl he tahchun ahcun a thimi zatuak an tlawm deuh ngai.
Atutiang ahhin COVID-19 zawtnak ngei 212,000 hrawng an hmuh hna i a thimi 2,000 lawng an si.
