24 C
Hakha
Monday, November 18, 2019
More

    Australia palek cu ‘mawtaw in mi pah hram a timtu’ thi lakin kahnak nawl pek an si cang

    Follow Us

    99,184FansLike
    135SubscribersSubscribe

    Ṭial Tharmi

    Facebook nih fake account 5.4 billions hrawng a thah

    Facebook nih, "tu kum chungah fake account 5.4 billions hrawng kan thah i, ngakchia hremnak le mahlemah thahnawnnak an tarmi million tampi...
    - Advertisement -

    Tuni Nikhatni ah Australia ram hmun cheukhat i palek pawl cu ‘lamkam minung hramhram in a pahtu le pah hram a timtu mawtaw mong pawl thi lakin kahnak nawl’ an pek cang hna, tiah Australia tadinca The Age, 9 News le Singapore tadinca Channel News Asia nih an thanh.

    Mah bantuk mawtaw mong pawl nihhin kum 2007 in atutiang ah Melbourne khuapi ah minung 8 thi lakin an pah cang hna i 45 an hliam cang hna.

    Victoria state khualipi Melbourne cu Australia ram ah khua nganbik 2nak asi i minung 5 million (Chin state milu nakin let 10 tam deuh) hrawng an um. Khuahriang ah Chinmi thong tampi an um ve. Khua nganbik cu Sydney asi i minung 5 million leng an um.

    State Palek bawizik changtu Shan Patton nih, “mawtaw in mi a pah hramhram tu le pah hramhram a timtu pawl khamnak caah palek nih nawlngeihnak phun tampi an ngei cang,” tiah a chim.

    “Hmasa upadi vialte an hman khawh pinah, thi lakin kahnak nawl zong an ngei cang,” tiah Melbourne khuapi ah thawngla pawl a chimh hna.

    Pu Patton nih, “upadi chungah ‘thi lakin kahnak nawl’ telh hi a faktuk deuh ko nain, hi bantuk dirhmun ah palek nih zei dah kan tuah khawh ti fiang tein an hngalh hi a biapi tuk hringhran,” tiah a chim.

    “Mawtaw nih mibu a pah hna tiang hngah kan duh lo, a pah hna hlan hrimhrim ah kham kan duh,” tiah a chim.

    Dawr pawng lamkam mibu mawtaw in a pah hramhramtu James Gargasoulas – 2017 January

    2017 January ah Melbourne khua lai ah dawr thil cawk aa thawhmi mibu cu mipa nih mawtaw in a rak pah hramhram hna i minung 6 a thah hna i 27 a hliam hna. Minung 6 an thihnak kong cu atu hi hlat an timh lio asi.

    Mah kong hlathlainak an tuah tikah, mawtaw mongpa hi khua lai ah kal lo dingin palek nih an rak kham awk si maw ti zong an hlat chih te lai.

    Mawtaw mongtu James Gargasoulas cu minung 6 a thahmi hna ruangah nun chung thong an thlak. Palek nih “ralhrang he cun pehtlaihnak a ngei lo,” an ti.

    Mi pah hramhram a timtu mawtaw mong pawl palek nih thi lakin kah khawhnak upadi cu atu hman colh asi cang. Mah bantuk upadi hi Australia ram ah a um bal lo, avoi 1nak asi.

    Nawlnak: Kan website chung ca hi website dangah copy piak lo dingin kan in nawl hna.
    Lian
    Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.