Australia cozah nih, “Vietnam ram cu AstraZeneca COVID-19 raikhamsi 1.5 million kan hlut lai,” tiah a thanh.
Atu hi Vietnam ram cu ‘Delta’ tiin auhmi avoi 4nak COVID-19 ci aa thlengmi a karh tuk caah cozah nih chawhvah a khap thluahmah liopi asi.
COVID-19 hrik hi minung tampi kan i chawnh tikah duhsah tein amah tein aci aa thleng lengmang. Delta hi avoi 4nak aci aa thleng cangmi si i hmasa nakin let tampi in chawnh le thih a fawi deuh. Delta cithleng cu India ah an hmuh hmasa bikmi asi.
Australia Chawlehnak le Khualtlawnnak Vuanci Pu Dan Tehan le Vietnam Deputy Prime Minister Pham Binh Minh meeting an tuah hnu ah Australia nih raikhamsi hi zat bawmh a timh hi si. Mah pinah raikhamsi cawknak caah Australia tangka $40 million zong a bawmh chih lai.
Vietnam cozah nih, “Japan zong nih July thla chungah AstraZeneca raikhamsi 1 million a kan kuat lai,” ati.
Vietnam cu March thla in raikhamsi chunh an thok i AstraZeneca deuh lawngte an hman, nain an khul nuarh tuk caah mi tampi an phunzai.
Atutiang ahhin Vietnam rammi 3.8 million hrawng lawng hi raikhamsi voi 1 te an i chun. Voi 2 aa chun cangmi cu ting 3 dengmang lawng an si. An rammi dihlak 98 million an si caah a nai rih lo.
