Australia Mi Auhnak Ah Kan Chin Miphun Nih Ralrin Le Fimkhur Kan Herh

Sang Hre

Nai hrawng hi Australia Cozah nih tangka in mi auhnak a van on bak in mah kong hi buai sup cio a si. Culakah, Cozah nih khua te lei nan um i nan chung le kha 202 SHP (Special Humanitarian Program) in nan auh hna ahcun hawihlei ruahpiak (priority) nan si lai ti mi an van ka ti cang ka in khuapi lei um mi pawl nih heh tiah an unau, an unau a silo mi tiang unau min in auhnak an tuah hna tiah an ka chimh.

Mah nak in tih a nung mi cu Lai tlang a ummi tiang an auh hna i mah auhnak cu an tuah cuah mah hna. Lai lei cun a run run bak in Malaysia ah an rak pok cuahmah an ti. An ka chimh mi a si ca’h 50% cu a hman lo kho.

Theih hrimhrim ding:

1. SHP (202) mi auhnak 1981 in an rak awt in nihin ni tiang peh zulh peng a si. Tukum ca
zong ah case 1000 hrawng reserve an chiah nain khuatelei (regional areas) hi hawihlei in
kan ruah piak hna lai ti hi fiang ko in kan Cozah nih an chim. Cozah bia chim cu an
tuah mi te lawng an chim.

2. 2014-2015 CPP mi auhnak a part lio ah he tiah 202 auhnak an rak tuah hna i a cheukhat cu zei tik hmanh ah appeal letter (nawlnak ca) rak tial ti hlah uh a ti mi tiang in an um. Acheu khat cu cakuat let ti lo mi le a tlamtling thai mi zong a um ve.

3. Khualipi pawl a si mi Melbourne, Sydney, Brisbine, Adelaide le Perth tbk i a um mi nih
khin auhnak tuah khawh a si lo tinak a si lo. Tuah khawh a si ko nain Cozah nih khuate lei
a um mi nih mi auhnak an tuah mi kha hawihlei in a ruah piak hna lai i Cozah case chiah piak mi ah Khuate lei um mi nih application an tlinh ahcun khuapi lei tuah mi tu cu tinco awk a um ti lo tinak a si lai.

4. 2015 tiang bantuk si ti loin a tulio kan Cozah nih atuah mi cu a ramchung lut mi
paoh paoh (ralzam a siah, ralzam lo a si ah) a hleice in hlethlainak an tuah cang. Mah cu
kan Facebook (social media) tiang in an zoh dih. Cucaah, Laitlang a um ko mi Malaysia
van auh riang mang i auhnak van tuah piak ti mi hi kan Chin miphun nih khua nan ruah
taktak a hau. An reject lo in len kho sual hna seh law citizenship sok tik ah a record vial te
kherhlai dih ah kuat a tong ding a si ahcun Chin Community pawl hi zei hmanh ai thlak
ngam ding kan um ti lo. Cucaah, nan unau India le Malaysia ah um mi tu auh hna uh law
Laitlang tiang cu auh lo hi a tha bik. Nan hngakkau tuk ruangah kan miphun thangchiat ter tu nan si lo hi a biapi tuk.

5. Australia phak hnu ah unau hmanh hmun khat um tti khawh an si lo. Cucaah, na unau a
si lo mi unau in nan i auh tik ah hin hmailei caan sau pi tiang caah khua ruah nan hau. An
phak hnu ah min thleng le a ngah ti lai lo. Nan kal tak mi unau cheu khat tiang nih Australia tlawn duh zongah an rak tlawng kho ti lai lo. Cun, nan i chim ruah lio bantuk in hi ka phak hnu ah thil a cang lo tikah le nan buaibai tik ca tiang ruah a hau. Australia um cia mi hmanh kan buai tuk cang. Unau ai chawn kho lo mi an tam tuk cang. Cucaah, khua fak piin nan ruah a hau.

6. Atu bantuk ningcang loin kan mipi nih thil nan tuah mi pawl hi Home Affairs sin a langh
than te tik ahcun Cozah sin ah heh tiah kan auh len mi pawl khi pakpalawng an si dih te
lai. Zei ca’h tiah nan mah nih nan duhnak lawng nan tuah caah nan tuah mi thil hi
miphun he ai peihtlai peng mi a si nan theih lo lio ah kan miphun ning pi in kan rak tem.
Kan miphun chung in minung pakhat nih thil sual a tuah mi hi miphun nih a temtuar ti hi
nan i fian awk hrimhrim a si.

Note: Mi auhnak hi Cozah nih National Security phunkhat ah an chiah caah kan nih
Chin miphun zong nih mah mi auhnak kan tuah tik ah hin khua fak piin ruah kan hau. Lai
tlang lei chim sawhnak le India le Malaysia lei chim sawhnak in khua nan khan lo a biapi
hringhren.

Cattialtu: Sang Hre (Australia)

Be the first to comment

Leave a Reply

Your email address will not be published.


*