Australia Citizen Soknak Thawngpang Thar

Advertisement

COVID-19

Vawleipumpi
41,100,263
A zawmi
Updated on October 21, 2020 10:27 am
Vawleipumpi
1,130,550
A thimi
Updated on October 21, 2020 10:27 am
Vawleipumpi
30,169,886
A dammi
Updated on October 21, 2020 10:27 am

Tu kum November thla tanṭim in cun rammi sinak test (phitnak) ah Australia ram sunsakmi nunphung kong telh a si cang lai. 

15 November 2020 thawk cun Australia rammi sinak phitnak (citizenship test) ah “zalong tein chimrel khawhnak, khat le khat i upatnak, aa ruangmi caantha tinco khawhnak, zaukphung tanhnak le phung/upadi zulhnak tibantuk Australia ram nih kan sunsakmi nunphung pawl hi telh a si lai i a soktu hna nih a hngalhfian le a duhtanh a hau”, tiah nihin Australia Citizenship Day ah atu lio caan karlak chung Minister for Immigration, Citizenship, Migrant Services and Multicultural Affairs a tuanmi Alan Tudge nih a chim. 

Atu a thar in an tuahmi Citizenship Test ahhin duhthim biahalnak 20 lengah Australia ram sunsakmi nunphung kong biahalnak 5 aa tel lai. A soktu nih nunphung kong biahalnak 5 le adang biahalnak pawl fonh in a tlawmbik 75% mark a hmuh khawh lawngah rammi sinak pek a si lai.

Mirang holh le zungzal ramchung khuasaknak (PR) kong ah a herh tiah an khiahmi cu aa thleng lo; hi hlan bantukin Mirang holh a zatawk in thiam a herh, cun PR in Australia chungah kum 4 khuasami si a herh.

Zeibantuk biahalnak pawl dah a um cang lai?

Nunphung kong biahalnak ah aa tel kho dingmi pawl cu:

• Zeiruangah Australia rammi vialte nih ram pumpi le ramkulh (federal & state) cozah thimnak ah thimfung thlak hi a biapit? 

• Mirangca (English) hi zapi nih an cawn awk a si maw?

• Nihsawh/sersarh na ton ruangah mi pakhat asiloah mibu pakhat cungah lehrulhnak/buaibainak na chuahpi kho maw?

• Pakhat le pakhat lung i khah lo tikah pakhat le pakhat i theihthiam awk a si maw? 

• Thitumhnak kong ah zalong tein an duhmi kha an i thim kho maw? 

• Chimhngaih lo/upat lo ruangah a nupi kha a va nih a tukvelh/pamh ding hi cohlan awk a si ko maw?

• Duhmi le tinhmi rian/thil kong ah nu le pa hna hi aa ruang tein hmunhma pek awk an si ti hi na lungtling maw? 

• Australia ahhin zalong tein chimrel/chimphuan khawhnak nawl hi upat awk a si maw?

 [Hi biahalnak pawl hi tahchunhnak in tuahmi pawl an si, a tak biahalnak pawl an si lo].

Rammi Sinak le Zungzal umkhawhnak [PR) Aa Dannak?

Atlangpi in, PR cu Australia ah a zungzal in umnak, riantuannak le sianginn kainak nawl a ngeimi an si i Australia passport an ngei kho lo. PR cu ram chungin ram lengah, ram lengin ram chungah luhchuah khawh lengmang a si ko nain ram chung luhnak permit/visa lo cun ram chungah luh thannak nawl an ngei lo. 

Rammi nih cun ram pumpi le ramkulh cozah thimnak ah thimfung (vote) thlaknak nawl an ngei i phung remhnak pawl zong ah thimfung an thlak khawh. Cun, ramdang ah an ngeihmi an fale hna zong Australia rammi in register an tuah khawh hna. Cu lengah ramdang ah harnak an ton tikah Australia palai zung ah bawmhnak an hal khawh.

Kum 1 Ah Minung Zeizatdah Australia Citizen an Ngah? 

1949 thawk in minung 5 million leng hi Australia rammi an cang. A liamcia kum 5 chungah 686,000 leng hi rammi sinak pek an si i 2019-2020 karlak ah pekmi hi minung 204,000 an si.

COVID-19 pulrai ruangah minung 84,000 leng hi online cung tonpumhnak in rammi sinak pek an si. Rammi sinak pekmi hna lakah a tambik hna cu India, UK, China, Philippines le Pakistan lei pawl an si.

COVID-19 Rammi Sinak Sokmi A Hnorsuang Maw?

Department of Home Affairs nih COVID-19 pulrai chung vialte rammi sinak sokmi pawl tawlrelnak cu pehzulh a si ko tiah an chim. 

Pumpak kohauh in biahalnak le test tuahnak pawl cu thla zeimawzat ngol chung a rak si ko nain atu ahcun Melbourne ti lo hmun dang cu thawk than a si cang. 

COVID-19 pulrai ruangah rammi sinak peknak pawl cu 2021 tiang hrawng khi online cungin tuah rih a si ko lai. Nihin ah Australia pumpi ah rammi sinak pek a simi hi minung 2,500 leng an si tiah an chim. 

Cherhchan: SBS

Caṭialtu: Salai Robert Ngun Sang

Email kan kua

Na email kan kua law, thawngpang thar kan in kuat peng lai.

FOLLOW US

102,313FansLike
53FollowersFollow
758SubscribersSubscribe

Ṭial Tharmi

Malaysia ah Salai Lian nih Mual a Kan Liamtak

Malaysia um tlangval Albert Thang Khan Lian Khai cu sunghno a nulepa sin kir manh loin nizaan ah mual a liam ruangmang....

Kawlram hlasa minthang Yan Paing Soe Covid-19 in a thi

Kawlram hlasa minthang Yan Paing Soe cu tuni October 21 chun 11:11am ah Covid-19 zawtnak in a nunnak liam.

UNHCR Thawngthanh: Refugee a Harsami cu Tangka Bawmhnak Rak Sokpiak Hna Uh

UNHCR Malaysia nih nizaan ah ralzaam bu upa pawl ca a kuat hna. Upatmi Bu Hruaitu Hna,

Australia lei in Sui Hlei Tial bulhnak tangka ting 21 an kuat cang

Australia hrambunh, Chin Broadcasting Network (CBN) in kan farnu Sui Hlei Tial caah GoFundMe in bulhnak hmuhmi AUD $2,460 = Kyats 2,188,998.29...
- Advertisement -