Australia ram minung tambik 2nak a simi Melbourne khua laicer Federation Square ah Chinmi hruainak in Kawlrammi a zaza nih ralkap duhlonak an langhter.
Australia ram ah Chinmi 15,000 hrawng an um. Tambik, 10,000 hrawng hi Melbourne ah an um.
Aung San Suu Kyi party NLD color a senmi an i hruk hna i ralkap nih an tlaihmi Suu Kyi hmanthlak an i put.
Duhlolanghternak hruaitu Pu Simon Sang Hre nih, “Australia cozah nih vawleipi theih in a kan chimhpiak herh, cun Myanmar ralkap hi phihkhamnak a tuah herh,” tiah Australia media SBS ah a chim.
“Dai tein kan inn ah kan ṭhu kho lo. Myanmar ram ah a cangmi thil hi vawleipi le Australia mipi theihter kan duh hna. Hramhram in ralkap nih mipi uknak a chuhmi hna hi kan cohlang lo.
“Myanmar ralkap nih mipi thimmi sinah uknak a pek ṭhannak hnga Australia cozah nih a rianṭuanṭi ASEAN chungtel ram pawl aa ruaih hna in ralkap hi an nam a herh.
“Cun, Australia nih Myanmar ralkap a bawmhmi zong a phih herh,” ati.
Australia Cozah Hmurka
Australia cozah nih Myanmar ralkap cu tangka $1.5 million dih in liamcia kum 5 chung tinṭan a pek, atutiang a ngol lo.
Mah kong he pehtlai in, Australia Ralkap Vuanci Zung nih, “thil sining kan zoh cuahmah lio asi,” ati.
Chawlehnak Vuanci Dan Tehan nih, “Australia nih Myanmar ralkap phihkhamnak kan tuah hlan ah kan rianṭuanṭi pawl he thil sining ṭha tein zoh dih hmasa a herh,” tiah a chim ve.
“Thil sining ṭha tein kan zoh dih hmasa lai i kanmah bantukin ralkap uknak a duh ve lomi ram pawl he hma lak ṭi kan i zuam lai,” ati.
Nilini ah Australia ram hruaitu Prime Minister Scott Morrison le US President Joe Biden phone an i chawnh lio zongah Myanmar uknak chuh kong an ceih.
Macquarie University ah Runvennak kong a chimtu Dr Roger Lee Huang nih, “uknak chuttu ralkap bawi phihkham dah ti lo cu Australia nih kan tuah khawhmi um huaha lo,” tiah a chim.
“Australia cu Myanmar ram ah sipuaizi tumtlang kan ngeih lo caah fak piin ralkap kan tuah khawhmi a um lo.
“Liamcia caan zongah Myanmar cu kum tampi chung ramdang nih an pehtlai lo i sipuaizi an rak phih nain ralkap uknak a rawk hlei lo.
“Australia nih kan tuah khawhmi um huaha lo nain, Australia ralkap nih Myanmar ralkap a pehtlaihmi hi cu cozah dik a lawhter caah a ngol awk si ko.
“Myanmar ralkap nih mipi thimmi cozah bia a ngaih lai tiin nitlaklei ram cozah pawl nih an ruahmi hi an i palh tukmi asi, Myanmar ralkap nih zeitik hmanh ah mipi duhnak a zul bal lo,” ati.
