Australia ram ah COVID-19 khamsi chunhmi kum 48 nu cu a thihri pit i a thi kal khawh lo caah a thi, tiah Australia cozah nih a thanh. COVID-19 khamsi chunh ruangah asi ‘kho men’ ati.
Australia Raikhamsi Himnak Hlattu Phu (VSIG) nih nizaan zaan tlai hnu ah meeting a tuah i ‘New South Wales state ah ummi nu raikhamsi an chunh hnu ah thi pih in a thihmi hi raikhamsi chunh ruangah asi kho men tiin bia a khiah’ tiah Australia Sii Tawlrelnak Zung (TGA) nih a thanh.
“A thihnak aruang dang kan hngalh lo caah, atutiang ahcun raikhamsi chunh ruangah asi tiin ruah awk asi ko,” ati.
Atu he cun, Australia ah raikhamsi chunhmi minung 3 bak thi pih (an thihri a pit i thi a kal kho lo) an tong cang. Nain, vanṭhat ah minung 2 cu an thi lo, damlei an panh cang.
Kum 48 nu cu raikhamsi an chunh ni 4 hnu ah a thi.
Anih hi zunthlum zawtnak le zawtnak dang zong a ngeimi si caah a konglam fiang tein biachah a har ngai, tiah TGA nih ati.
Raikhamsi an chunhmi cu UK ram Cambridge khuapi um AstraZeneca company nih a sermi ‘AstraZeneca raikhamsi’ asi.
AstraZeneca raikhamsi cu Australia ah minung ting 7 (700,000) leng an chunh cang hna i midang cu zeihmanh harnak an tong lo. Acunglei langhtermi minung 3 te lawng hi an si.
Nain, AstraZeneca raikhamsi hi Europe ram tampi ah minung nuai tampi an chunh cio hna i mi tam ngai thi pih an ton caah nai hrawng cu ceih a tong ngai.
Denmark cozah lebang nih cun liamcia ni 3 ahkhan “AstraZeneca raikhamsi cu kan hmang ti lai lo” tiin thawng a thanh lawlaw cang.
Australia cozah zong nih “kum 50 tang minung cu Pfizer raikhamsi chunh a ṭha/him deuh” ati ve cang.
