Aung La Nsang nih, “ramdangmi a ṭhinci tuk hna hlah uh, nan i zuam ahcun zei nan tuah paoh ah nan hlawhtling ve ko lai,” tiah Kawlrammi vialte bia a cah hna.
ONE Championship tuahmi MMA velhnak puai ah world champion 2 bak a ngahtu nih, “nan huammi ah i zuam uh. Nan i zuam ahcun zei nan tuah paoh ah nan hlawhtling ko lai,” ati.
“Caan pek hi a biapi bikmi asi. Caan pek tein i zuam ahcun zei tuah paoh ah hlawhtlin khawh asi,” tiah siaherhnak nganpi he Kawlrammi sinah thazaang peknak bia a chim.
A chungkhar kong zong an hal.
“Ka hlawhtlin hlan in ka nupi nih hin thazaang a rak ka pek. Ka minthan hlan tein a rak ka bawmh cang. Tangka lei ka harsat zongah a rak ka bawmh. Aa ka bawmh zungzal. Mah cu zei tik hmanh ah ka philh lo.
“Ka fapa zong hi chuih le thongh a zuam ngai ve,” tiah a chim.
Aung La Nsang cu One Championship ah Middleweight le Light Heavyweight World Champion asi. Middleweight World Champion cu chuh dingin voi 3 an singkhaw cang nain a ven khawh peng.
Light Heavyweight World Champion taisawm bal cu naite October 13 ah Brandon Vera nih a singkhaw mi lawng kha asi.
Zaanglek (sports) ah Kawlram chungin amah tluk a hlawhtlingmi an um rih lo. ONE Championship puai cu vawlei cung ram 140 leng ah LIVE an thlah caah Aung La Nsang thawngin mi tampi nih Myanmar kong thuk deuh in an theih.
Theihternak: Hngalh a duhmi um ai kun, tu hnu tlawmpal ah Aung La Nsang a konglam tawifiang ka post lai.
