MMA ṭhuat thiam ONE World Champion Aung La Nsang zong ni fatin Myanmar kong a ngaihchiatnak ca a ṭial peng. A caṭialmi tete rel tikah lung a hno tuk hringhran.
Tuni zong “palek le ralkap nih mipi nan kah hna hlan ah nan fale le chungkhar kong ruat hmasa uh,” tiah atanglei bangin a ṭial.
Pakhatnak bikah, kanmah luatnak caah a nunnak a petu kan miralṭha hna nih an liamtakmi chungkhar dihlak nan ngaihchiatnak kan tuarpi hna ti hi chim ta ka duh.
“Kum 19 te lawng asi rihmi Ma Kyal Sin cu nizaan Mandalay buai lo tein sandahpiah lio ah ralkap nih sniper in an kah. Kuan leu nih a khenmi si lo, tinh ciammam tein alu ah an kah. Fanu a ngei vemi ka si bang, apa le a chungkhar kong ka ruah ah ka celh lo. Martial Arts a uar ngaimi si i “Everything will be OK” ti aa ṭialmi angki i hruk bu tein a nunnak liam. Thisen tampi a luang rih lai i mi tampi an thi rih lai. UN, zaangfah tein kan mipi hi bawm ko sawh hna.
An nunnak an i pekmi hi zeitik hmanh ah kan philh lai lo, zungzal in zungzal tiang upat awktlak an si.
Pahnihnak ah, buai lo tein sandahpiahtu mipi hna fak piin tukvelh le thahnawn hi ngol cang uh tiah toidornak he ralkap cozah kan nawl hna.
Palek le ralkap cah kan duhmi hna cu, meithal zang nan phelh hlan ah nan fale le nan chungkhar kong ruat hmasa uh ti ka duh.
Atu sandahpiahtu hna hi nan unau, nan farle, nan rammi an si. Nan ral an si hrimhrim lo.
Cucaah, zaangfahnak tein minung 1 nunnak nan lak hlan le minung 1 fahnak nan pek hlan ah ṭha tein i ruat hmasa uh tiah kan nawl hna.
A donghnak ah chim ka duhmi cu, kan biaknak aa dan zongah, miphun dang kan si zongah, Myanmar minung kan si dih.
Kan dihlak in khat le khat i dawt le zawnruah nun kan cawn cio awk asi. I tukvelh le i thahnawn nih kan ram a ṭhatter lai lo.
Thisen luan hi dih cang sehlaw atu boruak hi i thahnawn lo tein aphi hmu usih ti hi ka thlacamnak le ka saduhthah asi.
