Kachin miphun Aung La Nsang le US Filipin pa Brandon Vera an i phomhnak puai zoh lio ah Myanmar ram, khua 3 in minung 4 an thi tiah palek le mibawmtu bu nih an chim.
October 13 i Japan ram ah tuahmi MMA (One Championship) Light Heavyweigh taisawm cuhnak puai TV zoh lo ah Yangon ramtthen, Irrawaddy ramtthen le Kachin state in minung 4 an thi.
Okekan peng, Shan Suh khuate ummi U Hlan Win cu ‘Aung La, thong chih! thong chih’ a ti lio ah a tlu. Mibawitu bu nih sizung ah an kalpi nain a nunnak liam.
Okekan, Ohphoe lam ah a ummi U Maung Tin Soe cu ‘Aung La nih a tei cang’ tiin a au lio ah a tlu i Okekan sizung ah an kal pi. Yangon sizung ah kal an fial hna nain sibawi te nih a nunnak a khamh kho lo i kir lei ah a nunnak liam.
Irrawaddy ramtthen, Dedaye peng ah a ummi kum 71 tarpa zong Aung La Nsang puai a zoh lio ah aa nuam tuk i a nunnak liam. Aung La nih Vera a tei ahkhan aa lawmh tuk ah a tho i ‘Myanmar hey! Myanmar kuah!’ tiin aa hlawhnak ah a tlu i a thi.
Kachin state, Danai peng ah a ummi pa pakhat zong Aung La nih Vera a tei ahkhan aa lawm tuk i a dir lio ah a tlu i a thi.
Kum 64 simi U Aa Si Se cu a tluk inkhan khuami nih sibawi sin ah an kalpi i a thi an tah tikah a thi kai tuk i a ka in thi a chuah caah Danai sizung ah an kalpi. October 14 ah a nunnak liam.
“Lung thi a kalnak a bit tuk silole lung he aa pehtlaimi zawtnak nan ngeih ahcun i lawmh tuk, i nuamh tuk silole ngaihchiat tuk le lungretheih tuknak hi na nunnak caah ttihnung thil a si kho caah i ralrin taktak a hau” tiah sibawi Kyaw Suar Oo nih a chim. – 7Day Daily
