Aung La nih Vera phomh a timh ning kuat a phuan, a tei kho lai maw

98,773FansLike
51FollowersFollow

October 13 a hung phanh cun, Myanmar paṭhawng Aung La N Sang le a ral vialte lakah a ṭhawng bikmi US chuak Filipin pa Brandon Vera cu Japan khualipi Tokyo ah an i phomh lai.

Middle weight le light heavyweight ONE World Champion 2 bak a ngahmi Kachin Jingphaw pa cu pe 6 le letmah 2 a sangmi heavyweight ONE World Champion pa Vera nih a light heavyweight champion taisawm chuh dingin a singkhaw caah, Aung La nih a taisawm a veng kho lai maw tiah Myanmar rammi vialte cu thintur in October 13 zaan an hngak ko.

“Vera hi ka ral vialte lakah a ngan bik, a tha ṭhawng bik le a kutke sau bik (lam hla bik a ṭhua khomi) asi. Keimah nakin a sang deuh fawn, cun cawl kho loin puaipiat in tei khawhnak thazaang a ngei,” tiah Aung La nih The Myanmar Times interview ah a chim.

“Vera hi aa ṭhuat tikah chanbaunak a ngei theng lo, nain phihaa pek ahcun a ṭhawng ti lo. Cun det chih ahcun a duai deuh. Mah hi caanṭha ah kai hman lai,” tiah Burmese Python nih a chim.

“Kan i ṭhuat tikah Vera hi a ṭhawng ngai te lai tiah ka ruah. Keimah nih phihaa ka pek khawh deuhnak hnga ka hel peng lai, ka laam hnawh peng lai. A cawlcangh ning key hrawh kai zuam lai.

“Mah i phomhnak caah hin thil rit cawi le mi ngan pipi he ni 1 voi 2 peng, zarh 1 ni 6 peng ka cinh. Cun ka khing zong kai rihter deuh i atu hi pound 15 kai chap i pound 220 ka si cang,” tiah kum 34 pa nih kum 41 pa tei dingin aa zuamnak kong a chim.

March thla ah a middleweight champion taisawm chuh dingin a singkhaw tu Japan pa Ken Hasegawa cu Aung La nih a tei cangka in bual chung bakah Brandon Vera nih a luhhnawh i ‘na light heavyweight champion taisawm kan singkhaw…’ tiin a singkhaw.

Aung La nih, “Vera hi ka uar tukmi a fan bak ka si caah amah he i phomh cu ka vanṭha tuk tiin aa ka singkhaw mi ka cohlannak si,” ati.

Aung La vs Vera official trailer by One Championship

Thinlung in thazaang tei

Vera cu World Extreme Cagefighting Heavyweight Grand Prix Champion le Ultimate Fighting Championship (UFC) ah aa rak phomh balmi zong asi i a mi thong le chuih a pin taktakmi asi. Voi 23 aa phomh i voi 16 a awng, tiah Sherdog nih a langhter.

MMA thimsang pawl nih ‘tutan i phomhnak hi cu ruahdamh a har ko’ an ti cio.

“Aung La hi a kut he a ke he knockout (KO) in teinak thazaang a ngei vemi si. Tlaih ahcun Vera nakin a rang deuh i a ṭhawng deuh fawn. Vera hi a baan le ke a sau deuh caah lam hla deuh a ṭhua kho, cun a mi thongh le chuih a dik tuk i cawl kho lo puaipiat in mi a tei khomi si. Voi 1 te kut lole ke thlak in cawl kho lo puaipiat (KO) in an i tei kho veve,” tiah Jason Maung, Lethwei le MMA gym Yangon Fight Club ngeitu nih a chim.

Sinain, Jason Maung nih cun Aung La a zumh deuh. “Championship ah Aung La hi aa ṭhuat tam deuh caah cei lakin ṭhuat tikah i ven a thiam deuh lai. Catlap cung ahcun 50-50 an si ko nain bual chung ahcun aho dah a lungput ṭhawng deuh ti kha a biapi,” tiah a chim.

Mah kong ahcun Burmese Python hi mak deuh dawh asi. “I phomh lai ahcun thinphang bak ko. MMA cu zaanglek har bak asi. Cawl kho loin lole i hngilh lakin ṭhuat na tong kho. Ka rian le ka chungkhar caah tei hrim a hau tiin ka lungrethei ko, nain bual chung i kai phomh rawh cun ka thinphang ti lo. Ka thinlung dihlak in phomh ning lawng ka ruat cang,” tiah Aung La nih a chim.

Jason Maung nih, “Aung La cu i phomhnak ah alu hlinh kho colh. Bual chungah thinphang le lungrethei in a um lo. Lungdai tein a um kho i ral tu dingin aa redi,” tiah a chim.

Yangon ah MMA gym TeamPT ngeitu Phoe Thaw zong nih, “Aung La cu i ṭhuat lio ah adang ruat loin alu hlinh kho i ṭhuat ning a ruat kho peng. Liamcia kum tlawmpal chung zong a cinh peng i aa ṭhua peng. A cinhnak gym hrim a ṭha tuk i a thiamnak a karh chin lengmang. Tei dingin i phomh a duh,” tiah a chim ve.

Phoe Thaw zong October 13 zaan i Aung La aa phomh hlan deuh ah South Korea pa Yoon Chang Min he an i phomh ve lai.

Myanmar pasal

Aung La cu 2016 March ah avoi 1nk bik Yangon ah Mohamad Ali he an i ṭhuat hnu in Myanmar ah a minthang. Mah hnu kum 3 chungah, Burmese Python nih Vitaly Bigdash, Alexandre Manchado, Mohammad Karaki le Ken Hasegawa cu a pehpeh in Yangon ah a tei hna caah Myanmar rammi thinlung ah hmunhma a lak. MMA ah voi 25 teinak a hmu i voi 10 a sung tiah Sherdog nih a langhter.

Kachin khualipi Myitkyina ah a chuakmi Aung La cu Yangon International School ah sianginn a rak kai. US ram ah cinthlaknak ‘agriculture science’ kai dingin 2003 ah aa thawh. Nain, hnu ahcun a duhmi MMA chunmang fuh in cinthlaknak cu a kaltak.

Florida state i Fort Lauderdale khuapi um Hard Knocks 365 ah a cinh pah in Aung La nih amah tein MMA kuat ai ser. Muay Thai, Brazilian Jiu-jitsu le Myanmar Lethwei cawh in Aung La kuat aa ngeih.

US ah a um ko nain, Aung La nih, “ka thinlung le ka thiamnak hrampi cu Myanmar in aa semmi si,” tiah a chim. Lethwei kuat hi ningcang tein ka cawng bal lo nain ka thongh, chuih, khuk le kio suk ning pawl hi Lethwei style asi. Ka ral pawl hi Lethwei kuat in tei ka duh hna,” ati.

Phoe Thaw nih, “Vera cu paṭhawng le mipi nih uar taktakmi asi ko, nain Aung La lawng a ṭhua lai lo. October 13 zaan ahcun Aung La fans Myanmar rammi vialte phihaa a ṭhuat chih hau,” tiah a chim.

Phoe Thaw le Jason Maung nih cun Aung La an zumh deuh. Nang ho dah na zumh deuh comment ve.

Sawmnak: October 13 zaan cu The Chin Express group ah live kan thlah ve te lai. Kan group member lawng nih hmuh khawh asi lai caah mah hi hmet law rak lut (join) cio ve uh.

Ṭial Tharmi

US Kawlram nu Su Hliang cu a ruak in an hmuh

US ram, Oklahoma khuapi um kum 16 Myanmar nu Su Hliang cu ni 2 chung a tlau hnu ah a ruak in...
Abiy Ahmed

Ethiopia PM Abiy Ahmed nih 2019 Nobel Peace Prize a ngah

2019 Nobel Peace Prize cu Ethiopia Prime Minister Abiy Ahmed an pek. "Daihnak lenter dingin le ramdang he i bawmh aa zuammi"...
Nilen Parmawi hla thar 'Min Sung Bik' a chuak cang

Nilen Parmawi hla thar ‘Min Sung Bik’ a chuak cang

Hlasak thiam Nilen Parmawi nih tuni ahkhan Pathian thangthatnak hla 'Min Sung Bik' aa chuah i a tanglei bantuk in ca a...

Hakha ah 4-star hotel pathum an sak lai

Chin state ah a um bal rih lomi 4-star level hotel pathum (3) sak dingin company le Chin state cozah nih lungtlinnak...
Conor McGregor cu biaceih zung a phan

Conor McGregor cu biaceih zung a phan

UFC fighter Conor McGregor cu Republic of Ireland ram, Dublin peng ah a ummi zuu dawr ah mipa pakhat a rak thongh...
Lianhttps://www.thechinexpress.info
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.

US Kawlram nu Su Hliang cu a ruak in an hmuh

US ram, Oklahoma khuapi um kum 16 Myanmar nu Su Hliang cu ni 2 chung a tlau hnu ah a ruak in...

Ethiopia PM Abiy Ahmed nih 2019 Nobel Peace Prize a ngah

2019 Nobel Peace Prize cu Ethiopia Prime Minister Abiy Ahmed an pek. "Daihnak lenter dingin le ramdang he i bawmh aa zuammi"...

Nilen Parmawi hla thar ‘Min Sung Bik’ a chuak cang

Hlasak thiam Nilen Parmawi nih tuni ahkhan Pathian thangthatnak hla 'Min Sung Bik' aa chuah i a tanglei bantuk in ca a...