A ra laimi Zarhteni (April 24) ah ASEAN ram pawl nih Indonesia ram ah Myanmar ram kong ceih dingin meeting tuah an tim i ralkap bawizik Min Aung Hlaing an sawm vemi kong ah Human Rights Watch nih nizaan ah thawngthanhnak a tuah.

Uknak firtu ralkap bawizik meeting ah an sawmmi hi ASEAN ram pawl nih ‘nangmah hi Myanmar uktu na si’ tiin an cohlan he aa khat tiah HRW nih a ti.

Ralkap bawizik Min Aung Hlaing cu February 1 thokin uknak a fir hnu ah le uknak a fir hlan pi zong in nuhrin covo buar kong ah aa tel caah US, England le EU ram pawl nih chawlehnak le khualtlawn phihkhamnak an tuahmi a si tiah HRW nih a ti fawn.

Cu ruangah, Myanmar ram ah buainak a chuahtertu, dai tein lam a zawhmi mipi a that tu le ram tampi nih dantatmi ralkap bawizik Min Aung Hlaing cu ASEAN nih an cohlan awk hrimhrim si lo, tiah HRW i Asia kong hruaitu Brad Adams nih a chim.

ASEAN meeting ah Myanmar ralkap bawizik Min Aung Hlaing an sawmnak sa in ralkap le ralkap bawi pawl an tangka hmuhnak company pawl dantatnak tuah deuh ding a si.

Ramkhel ruangah thongthlakmi pawl luatnak ding, mipi tukvelh, thah a donghnak hnga le mipi thimmi cozah a dir tthan khawh nak hnga ASEAN ram pawl nih an bawmh deuh awk tu a si tiah HRW nih a ti.

ASEAN meeting cu April 24 ah Indonesia khualipi Jakarta ah tuah an timh. 

Ralhrang ralkap uknak hrawh dingin April 16 ah an dirhmi Rammi Lungrualnak Cozah (National Unity Government – NUG) nih, “Min Aung Hlaing zaka ah kanmah kan sawm uh” tiin ASEAN cu an chimh nain ASEAN nih an duh lo.