ASEAN ram 10 nih Myanmar buainak kong meeting an tuahmi cu thil 5 an lungtling. Cu an lungtlinmi 5 ahcun Daw Aung San Suu Kyi le President Win Myint thlah ding aa tel lo.
April 24 ah Indonesia khualipi Jakarta ah an tuahmi Myanmar kong ASEAN meeting ahcun uknak firtu Min Aung Hlaing zong a kai ve i thil 5 an lungtlinmi cu Min Aung Hlaing zong a lungtling ve ti asi.
An lungtlinmi 5
(1) Myanmar ram buainak hi a rannak in daihter hrimhrim ding le aho paoh nih asi khawh chungin i sum cio ding.
(2) Buainak tel lo tein, mipi duhmi aphi kawl dingin ṭuanvo ngeitu phu vialte biaruahnak tuah ding.
(3) Biaruahnak cu ASEAN Chairman aiawhtu le ASEAN Secretary-General nih an tlangtlak lai.
(4) ASEAN hartong bawmhnak zung AHA Center in ASEAN nih hartong mipi bawmhnak kan pek hna lai.
(5) Ṭuanvo ngeitu phu vialte ton dingin ASEAN Chairman aiawhtu le a phu nih Myanmar an tlawn lai.
ASEAN meeting ah an lungtlinmi 5 hi an ṭha tuk ko nain, “Aung San Suu Kyi le President Win Myint telh in ralkap nih na tlaihmi 3,300 renglo kha a rannak in na thlah dih hna lai” ti an telh lomi hi cu sia a herh ngai.
Telh an timh ko nain an hlonh
“‘Aung San Suu Kyi le President Win Myint telh in ralkap nih na tlaihmi vialte thlah dih hna’ ti hi hmasa ahcun kan telh ko nain ASEAN chungtel ram cheukhat an lungtlin lo caah kan hnawh ṭhan,” tiah min langhter duh lomi ASEAN chungtel ram 2 palai nih an chim, tiah Asian Nikkei media nih a phuan.
