ASEAN le ramdang MP pawl nih CRPH an dirkamh

- Advertisement -

Malaysia, Singapore, Indonesia, tibantuk Asia Nichuah Thlanglei ram 10 MP (ASEAN MP) pawl le vawlei cung ramkip MP pawl kawmhmi bu Parliamentarians for Global Action nih “CRPH dirkamhnak cathanh” an chuah.

“Vawlei cung ramkip i atu lio MP le MP hlun pawl komhmi bu nih Myanmar mipi thimmi MP pawl (CRPH) kan dirkamh, cun Myanmar ralkap nih democracy upat law Hluttaw meeting pehzulh ter hna, cun MP pawl cu zeihmanh hnahnawhnak um lo tein an rian ṭuanter hna tiah kan in fial,” an ti.

“Myanmar Hluttaw thar thok ni February 1 ah ralkap nih Rampi Ruahnak Petu Aung San Suu Kyi le President Win Myint telh in NLD party lutlai pawl na tlaih hna. Mah hnu ah, ralkap bawi hlun a simi Vice President Myint Swe cu caankarlak president na ṭuanter. Mah cangka in kum 1 chung poipang na thanhter i rampi nawlngeihnak vialte cu ralkap bawizik Min Aung Hlaing kut ah na pek ter dih. Ralkap nih State Administrative Council (SAC) tiin cozah thar na dirh i Hluttaw, President le Biaceihzung nawlngeihnak vialte nai lak dih.

“Uknak nan chuh buin, February 4 ah mipi thimmi MP pawl nih anmah tein rian khinh biakamnak an tuah. A thaizing ah, mipi nih a kan khinh bangin Hluttaw rian kan pehzulh lai tiin Rampumpi Hluttaw Aiawhtu Kawmiṭi (CRPH) an dirh.

“Hluttaw cu democracy suttung asi i daihnak, ṭhanchonak le nuhrin covo a len khawhnak dingah a herh hrimhrim mi asi. Hluttaw palai MP pawl nih thinphang lo tein le zalong tein an rian an ṭuan khawh hrimhrim a herh.

“Cucaah, kanmah bantukin Myanmar mipi thimmi MP pawl nih Hluttaw veng dingin le mipi nih an khinhmi hna rian pehzulh dingin an i zuammi hi kan thangṭhat hna i tha kan pek hna. Democracy phungphai le rianṭuannak a um khawhnak hnga, Hluttaw nih miphun le biaknak zoh loin Myanmar mipi dihlak duhnak tuah hi a biapi tuk.

“Ramdang le vawlei cung bu vialte, ahlei in Asia Nichuah Thlanglei Ramkomh (ASEAN) hrim nih, Myanmar ralkap hi atanglei langhtermi tuahter dingin hma la uh tiah kan in forhfial hna:

  1. Myanmar mipi duhnak zul sehlaw upadi ningin rianṭuan seh
  2. Atu lio ah aruang um loin a tlaihmi vialte a rannak in le aruang um loin thlah dih hna seh
  3. Hluttaw rian pehzulh ter hna seh le MP pawl hi tlerhnak le hnahnawhnak um lo tein an rian ṭuanter hna seh
  4. A rannak in internet le pehtlaihnak vialte ong dih seh
  5. Zalong tein lungduh langhternak nawl le buai lo tein sandahpiahnak nawl upat sehlaw soiseltu le sandahpiahtu pawl fahnak pek i sum seh”.

Cathanh chuahtu: ASEAN Parliamentarians for Human Rights le Parliamentarians for Global Action

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih.Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...