Myanmar ralkap nih nizaan ah NLD cozah uknak a chuh caah US President Joe Biden nih, “Myanmar sipuaizi ka phih lai,” tiin cathanh a chuah.
Myanmar ralkap nih uknak a chuhmi cu President Biden nih, “Myanmar democracy lamthluan hrawh asi,” ati.
“Liamcia kum tlawmpal chungah Myanmar ram cu democracy lei a panh caah U.S. nih sipuaizi kan phihmi kan onpiak.
“Sinain, ralkap nih ram an uk ṭhan caah sipuaizi kan onmi vialte kan zohṭhan lai i aa tlak ningin hma kan lak lai,” ati.
Myanmar mipi caah apoi tuk
US nih Myanmar sipuaizi a phih ṭhan ahcun Myanmar ram a sifak lai i nang le kei zapi zaraan nih sifah kan tuar ṭhan lai. Ralkap nih an tuar lai lo.
Liamcia ralkap cozah chan ah US nih Myanmar sipuaizi a phih caah kan ram cu vawlei cung sifak bik ram ah aa chuah.
Rampi a sifah cang cun rammi zapi zaraan zong kan sifak dih. Ralkap cozah chan lio ah a sifak mi cu nan fiang tuk ko lai.
Kum 2010 ah ralkap cozah nih thimnak a tuah i duhsah tein democracy lei ah kar kan hlan caah 2012 hnu in US nih sipuaizi a kan phihmi a on thluahmah i kan ram ṭhancho lei a panh.
Cucaah rammi zapi zaraan zong duhsah tein kan khuasak a hung fawi deuh.
President Biden nih sipuaizi a kan phih ṭhan ahcun rammi zapi zaraan sifah kan i thok ṭhan lai. Ralkap bawi Min Aung Hlaing te pawl cu an thih tiang le an techin fapar chan tiang ei awk an ngei, an caah zeihmanh apoi nak um lo.
Hohmanh nih ralkap le a bawmtu USDP cu kan duh hna lo, nain ralkap ruangah US nih sualnak ngei lo Myanmar rammi kan techin fapar chan tiang a kan hrem than ding cu lung a fak ngai.
