An hnek tuk caah US nih ram sifak pawl COVID-19 raikhamsi 500 million a hlut rih hna lai

An hnek tuk caah US President Joe Biden nih, “Ram sifak pawl hlut awk ah COVID-19 raikhamsi 500 million kan cawk chap lai,” tiah thawng a thanh.

“US ram ah pulrai kan tei khawhnak ding ahcun ramkip ah kan tei ve a herh,” tiah Biden nih a chim. COVID-19 pulrai hloh dingin vawlei cung hruaitu pawl Nithumni ah online meeting an tuah lio ah hitin a chim hi si.

Meeting ahcun Britain, Canada, Indonesia le South Africa, tibantuk ramdang hruaitu pawl le Vawlei Ngandamnak Bu (WHO) hruaitu Tedros Adhanom Hebreyesus zong an kai ve.

COVID-19 zawtnak nih vawlei pumpi ah minung ting 500 deng (4.9 million) a thah cang hna.

US nih COVID-19 raikhamsi 500 million a hlut rih ding he cun, a hlutmi dihlak hi 1.1 billion asi cang lai tinak asi. Thiamsang pawl nih an chimnak ah, ram sifak deuh pawl caah raikhamsi 6 billion hrawng a herh, ti asi.

Ngandamnak lei thiamsang pawl nih, “Ram rum pawl nih ram sifak pawl an bawmhmi hna a tlawm tuk. Ahlei in US hrimhrim hi a luan tuk. Ram sifak pawl raikhamsi an i zat lo lio ah US mipi cu voi 3nak tiang chunh a timh hna,” tiah ram rum pawl, ahlei in US cu fak piin an mawhchiat i ram sifak pawl bawmh dingin an hnek peng.

Texas um Baylor University i National Tropical School of Medicine professor a simi Peter Hotez nih, “President Biden acozah nih US mipi raikhamsi voi 3nk chunh a kan timhmi hi a ṭha ko, nain atu lio cu ram sifak pawl raikhamsi an tin lo caah anmah hi usa pek hmasa hna ding asi,” tiah a chim.

“Ram sifak pawl caah raikhamsi 6 billion hrawng a herh,” ati.

Doctors Without Borders ah hruaitu a simi Carrie Teicher nih, “Pulrai donghternak caah raikhamsi hlut lawng aza lo. Kan hlut lai an ti lenmi hi tam deuh cu atutiang an hlu taktak rih hna lo. Pfizer hrim cu a kih taktaknak ah chiah a hauh caah ram sifak pawl nih chiahnak thilri tlamtling in an ngei lo, hi bantuk zong bawmh an herh,” tiah a chim ve.

Ram sifak hruaitu pawl zong nih, “Ram rum pawl nih raikhamsi a chuah hlan in nan booking cia dih ruangah ram sifak pawl kan ting lo i kan ram ah zawtnak a karh tuk caah hiti ning cun COVID-19 ci thar a chuak ṭhan te kho men,” tiah an thinphannak kong an chim lengmang.

President Biden nih, “COVID-19 raikhamsi kan hlutmi hna hi rianrang tein an chunh khawh hna nak hnga chunhnak caah tangka $370 million kan hlut hna lai. Cun, Vawlei Pumpi Raikhamsi Chunhnak Phu (GAVI) sinah $380 million kan hlut lai,” ati.

Pfizer raikhamsi pawl cu US ram ah an ser/chuah hna lai i ram sifak deuh pawl an kuat/hlut thluahmah hna lai. Pfizer raikhamsi si cu US cozah nih dur 1 ah $7 in a cawk lai, tiah thil sining a hngalmi pakhat nih a chim.

US nih ramdang hlut ding a cawk tharmi Pfizer raikhamsi cu January thla in kuat hram a thok te lai.

Charhchan: Reuters

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...