Australia — South Australia state khualipi Adelaide um Chinmi hna (Chin Community South Australia) nih Australia meikang hartong hna caah cozah sinah phaisa $8,000 an hlut.

CCSA nih, “kan members hna nih kan umnak Australia ram harnak a tongmi hna caah kan ti khawh tawk te kan tuahmi cu Hon. Jing Lee (Assistant Minister to the Premier le Minister for Multicultural Affairs) nih a kan cohlan piak cang,” tiah January 20 ah thawng a thanh.

“Lungrual tein thil tuah hi hmual a ngei hringhran,” ati.

Adelaide Chinmi nih $8,000 an hlutmi a cohlan lio hmanthlak cu South Australia state Hlutdaw Sang i MP a simi Jing Lee nih nizaan ah a Facebook page ah a tar i lunglawmhnak ca saupi a ṭial.

“Chin Community South Australia nih SA Bushfire Appeal sinah siang tein $8,000 nan hlutmi cungah kan i lawm,” ati.

Adelaide khua pawngte ah a ummi khuate 2; Cudlee Creek le Kangaroo Island cu mei nih ciam dihlak in a kangh hna i khuami hna cu an inn le thilri zong an sung dih.

Cu hartongmi hna caah cun South Australia state cozah nih mipi sinah bawmh halpiaknak a tuah. Cutin bawmh halpiaknak a tuahmi cu “SA Bushfire Appeal” tiah a auh. Chinmi lawng si loin state mipi nih an ti khawh tawk cio an hlut i atutiang ah dollar 4 million leng an hlut cang.

Hartongmi hna cu thilri cawkpiak si loin anmah tein an herhmi cio an i cawk khawhnak hnga a tangka in kan pek hna lai, tiah cozah nih a thanh.

MP Jing Lee nih, “2006 ah minung 49 tein aa thok i atu Adelaide Chin Christian Church ah minung 1000 fai te, mi tlawmte a simi Chin community nih hartong midang an bawmh cu an i hruainak a ṭha i zohchun awk an tlak tuk hringhran,” ati.

Chin refugee hna an teimaknak, lungṭhawnnak le an thazaang nih kan state a ṭhawnter i a lumsat ter chin. Atu zong Bushfire Appeal ah an thil tuahmi kan hmuh bang kan ram caah thil ṭha a chuahpi tu an si, ati.

Australia ram ah Chinmi tambik kan umnak Victoria le Western Australia zong fak tuk in mei nih a kangh nain Chin khrihfabu tumtlang pawl nih bawmhnak an pek ti thawngpang kan thei rih lo.

Tial Lian Thang

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express...