Malaysia um Chin ralzaam zohkhenhnak bu pakhat a simi Alliance of Chin Refugees hruainak in Cameron Highlands, SG IKAN (cinthlaknak lo) ah rian a ttuanmi Chin ralzaam pawl cu man lo tein an ngandamnak an checkpiak hna.
ACR sikhan in sibawi 5, nurse 4, ACR sianginn in saya 4 le ACR zung rianttuan tiin minung 18 cu October 12-13 ahkhan Cameron Highlands um Chinmi sinah an va kal.
SG IKAN cu sizung le sikhan he aa hlat ngainak hmun pakhat a si pinah tlunkalnak zong a har ngai. Cun, a kihnak hmun zong si fawn.
Sibawi te nih Chin ralzaam minung 64 cu man lo tein an check hna, an thlop hna pin ah a herhmi sii, vitamin, hrukaihawk thil le a dangdang laksawng an pek chih hna.
Sibawi te cu an tlunkalnak caah tangka tampi an dih lawng siloin chukcho le lam chia tan in Kawlrammi hna sin an kalmi hi dawtnak ruangah a si.
“Chin ralzaam cungah dawtnak nganpi le hmaipanh tein an ngandanmank a checkpiaktu sibawi te, nurse le hnipuan le laksawng a hlutu dawtu vialte nan dihlak cungah kan i lawm tuk.”
“A let tampi nan hlawngtling hram seh. Hmailei zongah Chin ralzaam hna an umnak hmun dangdang zongah kal khawh kan i zuam lai” tiah ACR nih a ti. – ACR
