October 26 zinglei ahkhan Rakhine state ah riantthialmi palek le ralkap an i citmi Shwe Nadi Express tilawng cu Arakan Army (AA) nih hramhram in an dirter i palek 30 hrawng telhin minung 40 leng an tlaih hna.
“Palek le ralkap pawl cu check an hauh ruangah kan tlaihmi hna a si,” tiah AA lei biachimtu Khai Thu Khah nih RFA sinah a chim.
“Tilawng hi Sittwe khuapi in zinglei sml 7 in a rak i thawh i tilawng chungah minung 160 leng an i cit. AA nih minung 40 leng a tlaih hna i a tangmi cu tilawng in a thlah tthan hna” tiah Rathedaung peng MP Daw Khin Saw Wai nih a chim.
AA nih a thlahmi pawl cu ralkap nih bia an hal dih hna hnu zaanlei sml 4 hrawngah tilawng cu Buthidaung khua a phan.
“AA tlaihmi minung 40 leng lakah ralkap 10 leng, palek 30 hrawng le thongtla zohkhenhnak zung rianttuan 2 an i tel. Tlaihmi pawl khamhnak dingah ralkap helicopter 3 hmang in AA cu kan kah hna,” tiah tuni ahkhan ralkap lei nih an chim.
