Chin state, Paletwa pengah liamcia thla 2 ahkhan Rakhine hriamtlai phu AA nih ‘uknak kong tinṭan kan in pek hna lai’ tiin a tlaihmi Pichaung khuami 5 an zaam.
Khuami pakhat nih, “AA nih tinṭan pek dingin a tlaih kal pimi khuami 5 an hung zaam. AA nih a tlerh hna caah an zaam hi asi,” tiah a chim.
Paletwa peng Pichaung auhsuh khuate pawl ah Rakhine hriamtlai phu AA nih ULA kan dirh lai tiin khua 1 ah minung 3 cio hramhram in a auh hna.
AA nih Paletwa peng nichuahlei le nitlaklei um khuami pawl cu liamcia thla tlawmpal khan hramhram in a auh/tlaih lengmang hna.
Cutin hramhram in a tlaih i tinṭan pekmi hna cu tinṭan an dih tikah khuate ah uknak lei ṭuanvo a pek hna (AA tapeh a ṭuanter hna), tiah khuami nih an chim.
Paletwa nitlaklei Bangladesh ramri um Pichaung khua auhsuh ahhin khuate 30 leng an um.
Rakhine hriamtlai AA hi kum 2019 thokin Paletwa peng nitlaklei um Pichaung auhsuh ah umhmun khuar an i thok.
Atu lio hi AA cu Chin ram Paletwa peng hmun tampi ah umhmun an khuar lio asi, tiah khuami sin in kan theih.
Ref: Chin World
