Rakhine hriamtlai bu Arakan Ralkap (AA) nih Rakhine state Buthidaung pengah Nilini ahkhan palek mawtaw bomb an puah i palek 2 an thi, minung 5 hliam an tong, tiah Thawngthanhnak Vuanci Zung nih a thanh.
Ramri hngak palek pawl a phortu palek kungka/truck cu Maungdaw Peng Biaceihzung in Buthidaung peng lei ah thongtla a ṭhialmi mawtaw a zulh lio ah AA nih bomb an puah hi si.
Khua luh lai vawlei chungah lam-hla control in puahmi bomb an rak phum, palek mawtaw cu bomb an puah pinah meithal in an kah chih len, tiah Thawngthanhnak Vuanci Zung nih a chim.
Palek truck chung ahcun palek 14 an um, thongtla ṭhialnak mawtaw chung ahcun tazacuaimi minung 10 an um.
AA nih palek 5 le thongtla (tazacuaimi) 2 an hliam hna. Palek 2 cu Buthidaung sizung ah an thlop ko hna nain hnu ah an hma in an thi.
“Ka theih tawk ahcun, Buthidaung Thong ah thlakmi pawl cu Maungdaw khua um Pengkulh Biaceihzung ah an chuahpi hna. An rung kir lei 4pm hrawngah, thongtla a zultu palek truck cu kah a tong,” tiah Maungdaw peng auhsuh cazi U Soe Aung nih a chim.
Buthidaung peng in Hlutdaw Niam MP U Aung Thaung Shwe nih, “palek truck aa citmi ramri hngak pawl kah an tong timi thawngpang cu ka theih, nain thongtla pawl hliam an ton/lo cu ka hngal lo,” tiah a chim.
Rakhine state palek bawizik Colonel Kyi Lin nih, “thawngpang dik asi ko, nain thil sining dikthlir cu ka hngal ve rih lo,” tiah a fehter. — The Irrawaddy
