AA le a ṭanhawi nih Pyin Oo Lwin khua i Ralkap Sianginn an kah, minung 1 an thah

Rakhine Ralkap (AA) le a ṭanhawi tlangcung miphun hriamtlai bu ‘northern alliance’ nih tu zingka ah Pyin Oo Lwin khua um Kawl Ralkap tinṭan kainak sianginn Defense Service Technological Academy (DSTA) an kah.

Mi sawhsawh 1 an thah hna i adang tlawmpal an hliam hna.

Tutan hi liamcia kum tampi chungah avoi khatnak bik DSTA an kah asi.

Ralkap biachimtu ralbawi Zaw Min Tun nih, “tu zingka 5:40am hrawngah Mandalay region um ralkap sianginn cu miakpi zun 5 lengin an kah,” tiah a chim.

“Sianginn caah rian a ṭuanmi mi sawhsawh (ralkap a si lomi) pakhat thah a tong. Ralkap pakhat hliam a tong. Sianginn pawngkam zong a rawk len,” tiah a chim

Ta’ang Miphun Luatnak Ralkap (TNLA) biachimtu Mong Aike Kyaw nih, “kanmah TNLA, AA le MNDAA nih kan kahmi asi,” tiah a chim. — anmah hi Kawl Ralkap he Rampumpi Kahngol Biahrennak (NCA) ah minsen a thu lomi hriamtlai bu an si.

“Kan hmunhma ah Kawl Ralkap nih a kan kah pengmi hi zor deuh seh tiin Pyin Oo Lwin ah ralkap kan lehrulhmi hna asi,” ati.

Naite i thawngthanhnak an tuah lio ah TNLA nih, “Kawl Ralkap nih mahka hmun ah raltuk kan ngol chung lai ati nain August thla thok ah Shan state chaklei ah Kawl Ralkap he voi 14 kan i kap. July thla ah voi 20 kan i kap,” ati.

Anmah hriamtlai bu 3 nih hin naite ah thawngthanhnak an tuah ṭi i ‘kanmah hmunhma ah Kawl Ralkap nih na kan kah pengmi hi ngol’ tiah an hal.

“Nan ngol lo ruangah ramchung ral a thawh ahcun nanmah palh asi lai,” an ti.

Shan state chaklei ah a ummi Naung Cho khuami nih, “Asia World Company nih a tlaihmi tangka liam in zulhmi highway lam pakhat cu Nilini zingka 5am hrawngah tapung nih mei in an khangh,” tiah an chim.

Nilini zingka tiangah, Kawl Ralkap le tapung (tlangcung hriamtlai bu) pawl cu Naung Cho khua pawng ah an i kap peng rih. Mahka le Pyin Oo Lwin kar a kalmi lam an phih dih.

“Atutiang ah minung 3 hliam an tong cang, 2 cu an lu ah hliam an tong i 1 cu a phei ah a tong. Pyin Oo Lwin ah kuat khawh an si lo caah Naung Cho Hospital ah kan kuat hna,” tiah ralkap bawi nih a chim.

Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial.