Rohingya nih Facebook cu ‘$150 billion kan liamh’ tiin taza an cuai

- Advertisement -

US le UK ram ah ummi Rohingya pawl nih Facebook company cu ‘$150 billion kan liamh’ tiin taza an cuai.

“Myanmar kalsual pawl nih Facebook ah Rohingya huatnak ca, hmanthlak le video an tar mi pawl kha Facebook nih hlonhpiak hna loin minung tampi sinah na va phawtzamhpiak hna caah Myanmar ram ah Rohingya miphun cihmih kan tonnak asi…, cucaah $150 billion kan liamh,” tiin taza an cuai hi si.

US ram ahcun San Francisco khuapi um biaceihzung ah tazacuainak ca cu an ap. “Facebook nih Myanmar ram ah Facebook hi lar seh tiin Rohingya nunnak a hman,” tiin tazacuainak ca chungah an ṭial.

“Facebook nih Myanmar ram in tangka a hmuh ding zei pipa asi lo buin Myanmar mipi nih Facebook hi hmang deuh hna seh tiin pumpak nih Rohingya huatnak an tar mi pawl cu minung tampi sinah a phawtzamh. Myanmar ram ah Rohingya huatnak kham loin a karh in a karhter,” an ti.

UK um Facebook Office zongah Rohingya sihni pawl nih tazacuainak ca cu an kuat. “Kan aiawhmi Rohingya pawl hi Facebook ruangah Myanmar cozah le kalsual phunṭanh pumpak le phu pawl nih tukvelh, tlaihhrem, thah le thlanglamh an tong…,” an ti.

UK um Rohingya aiawhtu sihni pawl nih cun UK um Rohingya lawng si loin Rakhine state in Bangladesh ah a zaammi Rohingya vialte (1 million hrawng) zong aiawh chih an timh hna.

“Hmai kum thok cun UK High Court ah Facebook cu kan chuahpi lai…,” an ti.

Rohingya pawl nih anmah aiawhtu dingah UK ram ah an hlanmi sihni company cu McCue Jury & Partners asi.

Facebook zong nih kum 2018 ah, “Myanmar ram ah Rohingya huatnak bia an chimmi video le ca pawl cu kan si khawh chungin kan hlonh/delete piak ko hna nain, kan chanbau deuh hrim ko,” tiah aa rak cohlan.

McCue nih, “Facebook nih Rohingya huatnak kham kongah a chanbaumi aa hngalh ko nain, mah ruangah tuksapur a tongmi pawl cu zeihmanh a bulh/liamh bal rih hna lo,” ati.

US ram ah tazacuainak ca an apmi ahcun, “Hitler nih Judah mi a rak tuahto hna bantukin Rohingya pawl hi kan doh hrimhrim hna lai” tiin kum 2013 ah Myanmar kalsual pawl nih Facebook ah an rak tarmi le kum 2018 ah Rohingya ralzaam pawl tilawng khat in an i citmi hmanthlak an tar i “Tuan deuh ah Allah sin an phak khawhnak hnga zinaan toih hna ulaw khang hna uh” tiin an ṭialmi tiang an telh chih.

Kum 2017 ah Myanmar ralkap nih Rakhine state um Rohingya an thahmi hi 10,000 leng an si lai, tiah hliam tong bawmtu bu Medicins sans Frontiers nih a ruahdamh.

Mah ruangah Rakhine state um Rohingya ting 10 (1 million) hrawng cu nunnak kawl in Bangladesh ram ah an zaam hna i atutiang ralzaam buk ah harsa taktak in an um hna.

UK ram i taza an cuaimi ahcun atutiang ahhin tatte Rohingya 20 an um cang. US ram ah tazacuainak an tuahmi cu US ramah a ummi Rohingya 10,000 hrawng aiawh in asi lai.

Facebook company ah rian a ṭuanmi nu Frances Haugen nih Facebook kong a phuan ning ahcun, “Ethiopia, tbk ramdang pawl ahhin Facebook nih miphun huatnak le buainak hi mei chem in a chem i a alhter chinchin,” tiah a chim.

“Facebook company ahhin huatnak ca/video/hmanthlak zohfel delete tu tampi an um ko nain 87% cu Mirangca/holh lawng an zohfel. A ngaingai ti ahcun, Facebook hmangtu chungah Mirang holh a hmangmi cu 9% lawng an si,” tiah a phuan.

Lian
Lianhttps://www.thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh."Missile kahnak seh kan remh...

Ukraine cu Poland nih ral tuknak vanlawng 28 bak FREE in a pek

Update: US nih a duh lo caah an leet. Poland nih dairek in Ukraine kuat a ngamh lo...

US: Ukraine nih a tei lai

US Ramdang Vuanci Pu Blinken (hmanthlak) nih, "Ukraine nih teinak a hmuh lai," tiah a chim."Russia nih Ukraine...