Myanmar ah COVID-19 Kakuaisi 1.5 million a Phan

Myanmar ram ah COVID-19 kakuaisi chunh 1.5 million (ting 15) a phan. Minung ting 7 le cheu (750,000) an chunh hna lai. COVID-19 kakuaisi cu minung 1 voi 2 chunh asi.

India nih manlo tein a hlutmi si i January 22 ah a phan.

Yangon airport ah kakuaisi a phak lio (hmanthlak) cu Yangon um India Tanzung lutlai Kumar le Myanmar cozah nih an lak. Kumar nih, “hihi India nih Myanmar laksawng a pekmi si,” tiin thawngla pawl a chimh hna.

India nih Asia ram pawl; Maldives, Bhutan, Bangladesh le Nepal zong manlo in kakuaisi a kuat cang hna.

China nih Asia ram pawl “manlo in kakuaisi kan hlut hna lai” ati caah China nih pei Asia ram pawl a hip dih cang hna lai hi tiin India nih a hlut hmasa hna hi si. Myanmar zong China sermi kakuaisi chunh ting 3 kan hlut lai tiin China nih bia a tiam nain a hlu kho rih lo. India nih a tei deuh kan ti hnga maw.

Kakuaisi cu UK hrambunh sii company AstraZeneca nih a sermi si i India sii sehzung Serum Institute of India nih a chuahmi si. Mah sehzung hi vawlei cung kakuaisi sehzung nganbik asi.

Myanmar Ngandamnak Vuanci Zung biachimtu Khin Khin Gyi nih, “kakuaisi cu Yangon um tikhalternak khaan pawl ah kan chiah lai. Ngandamnak lei rianṭuan le tar pawl usape in chunh hmasa an si lai,” tiah a chim.

“Kan ram ah ngandamnak lei rianṭuan ting 1 le thong 10 (110,000) leng an um.

“Kakuaisi a phan cang tiin mipi daithlang hlah uh. Zawtnak a karhnak hnga lo ngandamnak zulhphung zul peng rih uh,” ati.

Myanmar ram ah COVID-19 zawtnak ngei ting 1 le thong 40 deng an hmuh cang hna. Mah chungah 3,000 leng an thi cang.

Nai hrawng cu mizaw thar hmuhmi an tlawm deuh nain, sii lei thiamsang pawl nih, “Myanmar cu minung tlawmtuk lawng an test hna caah hmuh rih lomi mizaw an tampi kho men,” an ti.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...