Russia President Vladimir Putin nih ralkap thazaang tam taktak in nizaan ah Ukraine ram state 2 a luhhnawh cang.
Russia President Putin nih a ralkap ting 2 dengmang (190,000 hrawng) in zarh tampi chung Ukraine ram a kulh dih hnu ah atu bantukin Ukraine ram state 2 a luhhnawh hi si.
Ukraine President Volodymyr Zelensky a thinphang tuk i kenret ralkap (reserve) vialte zong ral tho dingin a auh dih colh hna pinah US, NATO le ramdang vialte nih kan bawm cio uh, tiin bawmh a hal hna.
Russia ralkap nih tank le hriamnam ngan he an luhhnawhmi Ukraine ram state 2 cu Donetsk le Luhansk an si. Mah state 2 ahhin ‘Ukraine kan si lo’ aa timi Russia tefa tampi an um i meithal i tlaih in tapung an tho.
Russia President Putin nih Russia tefa tapung cu a bawmh hna i, “Mah state 2 hi cu Ukraine ram asi lo, mah tein aa ukmi an si, cucaah Ukraine ralkap le an karlak ah remdaihnak ser dingin Russia ralkap ka luhtermi hna hi si…,” tiah TV in thawng a thanh.
Tahchunnak; Bangladesh cozah nih Rakhine state i Rohingya tapung ARSA khi bawm sehlaw Rakhine cu Myanmar ram asi lo tiin Rakhine ah Bangladesh ralkap torlecheng tank le hriamnam ngan he kua hna sehlaw… mah he cun aa lo.
Russia cozah nih, “Ukraine khualipi Kyiv um Ramdang Tanzung rianṭuan vialte a rannak in nan ram ah kir dih uh…,” tiin nawl a chuah.
Cucaah, Russia ralkap pawl hi atu an luhhnawhmi Ukraine ram state 2 ahhin sau caam loin Ukraine cozah umnak Ukraine khualipi Kyiv ah an lan lai i Ukraine ram an tuk lak lai, tiah mi tampi nih an zumh.
Hlan lio ahcun Russia ram hi Soviet Union (USSR) tiin rak auh asi i mah lio cun Ukraine ram hi Russia (Soviet Union) ah aa tel ve. Soviet Union a kuai hnu ah amah tein a dir. Russia President Putin nih hlan lio Russia penmi ram vialte lak ṭhan dih a duh i Ukraine cu ṭangṭi US le Europe (NATO) ah lut kho lo dingin a kham peng. Atu zong hi “NATO ah lut lo dingin bia nai kam ahcun ka ralkap ka kirter hna lai” tiin Russia nih Ukraine cu ati nain Ukraine nih Russia sal tan ding cu a duh lo. Hawi ram cio bantukin zalong tein mah tein dir peng le mah duhning in i ukhruai peng a duh ve.
Russia ralkap torlecheng nih Ukraine ram an luhhnawh cangka in US le NATO chungtel ram vialte nih Russia sipuaizi tampi an phih colh.
Nain, Putin nih US le NATO cu a ek hmanh ah a rel rua hna lo. Thi dengin an auhnawh i an tlerh len buin an hmaika bakah Ukraine ram a luhhnawh hual ko.
