Salai Ceu Bik Thawng: Taliban tapung nih Afghanistan khualipi an lak, Naypyitaw kan lak khawh tuk

Tuni ah Taliban tapung nih Afghanistan khualipi Kabul an lak; President Ghani a zam cang — Pu Zing Cung nih “Raldoh cu thinlung in doh asi” a timi kha hihi a si.

Taliban tapung nih Afghan ram cu an chim (ting) dih ngawt cang i atu hi Kabul khualipi an luhhnawh i president inn zong an lak cang — vabu hlawm in hlawm an timh. An ram president cu a zaam cang.

Pesident Biden nih naite July thla ahkhan “Afghan ralkap cu sing 3 an si i tha tein kan train hna i hriamtha kan pek hna. Taliban cu 75,000 fai lawng an si” tiah a ti. Asinain a ruahning bantuk a rak si naisai lo. Tapung nih vangkau in an thlaak hna. 

Zeiruang bik ah hme tapung nakin a let thum renglo in ralkap thazang a ngei i US nih pekmi vanlawng le meithal thatha a nei komi cozahpi nih cutirumro cun an der hnga? A mak ko. 

A biapi bik cu thinlung a rak si tihi a lang. Afghan cozah ralkap tamdeuh cu hlawhfa (ကြေးစား) lungput an nei. Kan ram kilvengtu kan si timi lungput an nei lo. US nih lahkhah pek ruangah kan tuan tiah an iruat. Cucaah eihmuarnak (corruption) zong khuaruahhar in ralkap chungah a karh i zohchia khin an um ti si. Cucaah tapung he tlawmpal an hun ikah men ah an lungdong i an zam, asiloah, an i-ap (surrender) colh. 

Taliban ralkap cu ‘kan ram kan lak than hrimhrim lai’ timi hacangrialnak lungput an ngei (Cheukhat cu hramhram in fialchom le hmuhtheih duh zong cu an um ko lai). 

CNF Chairman Pu Zing Cung nih “Zeibantuk hriam tha hmanh hi thinlung thawnnak he hmanti lo ahcun an hnawl dih” a timi kha Afghan ral dohnak le Vietnam raldohnak ah a fiang khun. 

Kawl rallokap hi sing 3 fai an um nain meithal tlai taktak ralkap hi 150,000 hrawng lawng an si tiah rallokap in a zammi nih an chim. Cucu tlangcung hriamtlai phu le PDF fonh zat hrawng fangfang a si ve ko tinak a si. 

Cucaah mitralchiat awk a um hrimhrim lo. Kan thinlung le kan lungrualnak kha biapi si ko. 

Kan tei hrimhrim lai.

Catialtu: Salai Ceu Bik Thawng

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...