Philippines: Myanmar daihnak ding ahcun Suu Kyi ‘aa tel hrimhrim’ a herh

Philippines Ramdang Vuanci nih, “Myanmar ram democracy ngahter ṭhannak ding ahcun Pi Aung San Suu Kyi aa tel hrimhrim a herh. Myanmar daihnak kong ceih paoh ah Suu Kyi aa tel hrimhrim a herh,” tiah tuni Zarhpini ah a chim.

Kan hnu zarh ah ralkap nih Suu Kyi kum 4 thong an thlak chapmi zong fak piin a mawhchiat hna.

Philippines Ramdang Vuanci Locsin nih, “Norway Ramdang Vuanci Huitfeldt bia kha ka kalpi ning bak asi ve. Myanmar ralkap nih ramkhel ruangah a tlaihmi vialte a thlah dih hna a herh, raltuk a ngol herh i nuhrin covo a upat herh.

“Myanmar mipi an tuar tukmi hi ka celh hrimhrim lo. Ralkap lutlai pawl nih hin Suu Kyi phu he biaruahnak tuah hna sehlaw an ram hi democracy lei ah kirpi ṭhan hna seh ti kan duh,” ati.

Philippines Ramdang Vuanci Pu Locsin

“Myanmar daihnak biaruahnak ah Suu Kyi aa tel lo ahcun pakpalawng asi lai. Upadi torlechang in taza an cuai i Suu Kyi nih ‘upadi ka buar lo’ ati ko buin atu karlak hmanh ah kum 6 thongdan an pek manh cang.

“Taza an cuai zongah Suu Kyi cu aa tel hrimhrim a herh. Suu Kyi he biaruahnak tuah hi Myanmar ralkap nih zeihmanh an ṭih awk um lo. Myanmar ram democracy an ngahter ṭhan ahcun ralkap ca zongah a let in ṭha deuh.

“Myanmar ram democracy ngahter ṭhannak ding ahcunn Suu Kyi tel lo a ngah lo. Suu Kyi he biaruahnak tuah ruangah ram buainak, ram ṭhencheunak le ramchung ral a chuak lai lo.

“Cambodia PM nih naite ah Myanmar a tlawnmi zong kha ka thinlung dihlak in tha ka pek.

“Myanmar daihnak caah ASEAN nih tuah ding 5 kan khiahmi kha tuah hrimhrim an herh. A changchang thengmang in tuah a hau lo. Tuah khawhmi paoh tuah hmasa thluahmah a herh,” ati.

Lian
Lianhttps://thechinexpress.com
Lian cu Seihnam Journal ah Editor-in-chief a rak ṭuan. UNHCR zung i RSC department ah kum 4 chung holhlet le calet a ṭuan pah in Faiceu Journal ah 'editor' in a rak bawm pah hna. 2016 ah The Chin Express a dirh i ni fatin Chin thawngpang le vawlei cung thawngpang phunkip a ṭial, atanglei ah rel khawh an si.

Thawngpang Thar

Aa lomi thawngpang

Lairam dawtu Lalbiakchhungi, Kimkima le Van Hlei Sung nih Chin ralzaam caah concert an tuah lai

Kan ram uknak ṭhat lo ruangah kan miphun nih harnak fak taktak kan tuar cuahmah. Ramchung le Mizoram...

Thawngṭha: Tangka tlawm deuh in Australia kal khawh asi cang

Malaysia le India um Chinmi tampi Australia an phak khawhnak hnga mi tampi hmuh dingin share cio usih. Malaysia...

Pu Vahnie le US Cozah tonnak: Myanmar Democracy Ngahter Ding, Ralzaam Ramthumnak ah Lak Ding

US Kawlrammi Zohkhenhnak Bu (Burmese American Community Institute - BACI) hruaitu Pu Elaisa Vahnie nih Washington D.C. ah...

India nih Pakistan ah missile ka kah sual, ati

India cozah nih, "Pakistan ram ah missile ka kah sual," tiah thawng a thanh. "Missile kahnak seh kan remh...