2020 thimnak ah mee ningcang loin a tuahtu NLD party cu kan hrawh lai i party hruaitu pawl cu ram rawi case in taza kan cuai hna lai, tiah Rampumpi Thimnak Zung (Union Election Commission – UEC) Chairman U Thein Soe nih tuni meeting ah a chim.
Tuni meeting a kai vemi Rakhine Miphun Party Chairman Dr Aye Maung zong nih,”2020 thimnak ah thil diklo a um len. Timh ciammaam tein thil diklo an tuah len. Thimnak tuah lai ah Minung Thazaang Zung le Lahwahkah Zung an dirhmi zong kha mee ningcang loin tuahnak khua an khanmi pakhat asi. Mee diklo, ahlankan mee le NLD tangka luhnak le hmannak pawl hlathlai hnu ah NLD party hrawh ding phun in UEC chairman nih a chim. Zeitik ah hrawh ding ti cu a chim lo,” tiah RFA sinah a chim.
Nain, 2020 thimnak ah NLD party in aa zuam i Bago ramṭhen Pyithu Hluttaw MP a ngahmi U Myint Oo nih cun, “Harnak tampi lakah tuahmi 2020 thimnak cu ramchung ramleng zohfeltu pawl zong nih an cohlan i ramdang cozah zongg nih an cohlanmi asi. Mi vialte cohlanmi teinak hmutu NLD party kan hrawh lai ti cu mipi vialte nehsawh asi,” tiah a chim ve.
“NLD an hrawh thawngin; NLD, tlangcung miphun party pawl le ralkap dotu chan thar mino hna nih federal ram dirh kan i zuammi cu uknak firtu ralkap le anmah dirhmi UEC nih an hrawk kho hlei lai lo,” tiah a chimchap.
