Italy nih UEFA Euro 2020 champion a ngah. England khualipi London um Wembley certual ah England he final an chuih. Goal 1 veve in an i tluk caah penalty an i sut i England cu an inn ciakhor bakah goal 3-2 in an tei hna.
England ah COVID-19 zawtnak a karh taktak nain bawlung aa hruh pimi ram veve kan ti cu certual khat in minung 60,000 bak nih an zoh hna.
Italy pa Jorginho nih penalty a sutmi England goalbawh Jordan Pickford nih a kham khawh ciammaam cu England mipi an i lawmh tuk ning khuari bantuk bakin an tur, nain penalty an i sut deuhdeuh i Italy nih an inn ciakhor bakah goal 3-2 in an tei hna.
Bawlung an chuih cangka in minutes 2 hrawng bakah England lei in Luke Shaw nih a goal colh i Italy an ṭan tuk ning hi cakei hmanh an tlaih lai ti awk tluk bakin an i biatak. An goal deng lengmang hna nain England pawl back ah an ṭum viar i an goal kho hna lo. Half-time hnu minutes 67 bakah Italy lei in Bonucci nih a goal. Caan dih tiang an i goal kho veve ti lo. Caanhlei an chuihter hna nain an i goal khawh hlei lo caah penalty an sut ter lawlaw hna.
Puai zohnak ticket a ting ti lomi pawl cu certual lengah chung sivaang taktak in an i tuai lulh hna. An celh ti lo i puai tanṭim ah certual an baoh lawlaw i an lut viar. Palik le security nih chet lawh an kham hna, an buai chiahru.
England hi bawlung chuih an thiam bak nain kum 1966 hnu in nizaan tiang final tiang an phan kho bal lo. Tutan hi kum 55 hnu ah avoi 1nak final an phak si caah UK siangpahrang fapa Prince William le a thaisung Kate le an fapa Prince George zong nih certual bakah an zoh ve hna.
UEFA Euro 2020 cu ni kum ṭhal ahkhan chuih lim ding a rak si cang nain COVID-19 pulrai ruangah an thawn i tutan ceo ah an lim hi si.
UK um ram 4; England, Scotland, Wales le Northern Ireland cu Europe leiṭhen ram vialte lakah COVID-19 mithi an tambiknak asi, a changtu ah Italy asi.
Certual ah a zoh kho lomi UK pumpi mipi nuai 26 leng zong nih BBC le ITV ah live in an zoh ve.
UK cu sianginn kai lio siangngakchia pawl zong an nulepa he nuam takin England vs Italy final puai zoh kho hna seh tiin Nikhatni cu ahopaoh tlai nak nawl an pek hna. England nih a tei lebang ahcun Nikhatni cu UK pumpi zungkhar ni siseh ti tiangin biatung an dirh.
UK ram hruaitu Prime Minister Boris Johnson tiang nih England team angki aa hruk i “teinak hmu hraam uh” tiin thazaang a pek hna. UK cozah tlaitu conservative party MP tampi zong nih England team cu thazaang an pek len hna.
Liamcia kum 55 lio, kum 1966 ah atu Wembley certual ahhin England nih West Germany tei in World Cup champion a rak ngah. Mah cu a donghnak bik ramkip bawlung chuih zuamnak ah champion a ngah si. Mah hnu cun final hmanh a phan kho bal ti lo.
Mah lio cun UK siangpahrangnu Queen Elizabeth II nih champion laksawng trophy a rak pek hna. Tutan ah Europe ram vialte bawlung chuih zuamnak ah Italy he final an kai cu mah lio hna kha a thar in mithlam an cuanter len.
