Tuni ah, Yangon um Denmark Tanzung, Finland Tanzung, Norway Tanzung le Sweden Tanzung nih Pau Dothlennak ah a nunnak liammi 1,323 upat peknak le philhlonak caah rose pangpar 1,323 zuun ngaih par an chiah.
Tuni December 10 hi Nuhrin Covo Ni (Human Rights Day) asi.
Cucaah tuni ah rose pangpar 1,323 zuun ngaih par in, a nuhrin covo hmangin Myanmar ralkap uknak duhlo langhter ruangah thah a tongmi Myanmar mipi 1,323 philhlonak le upat peknak an tuah hi si.
Yangon um Norway Tanzung Lutlai Hilde Solbakken nih, “Hmailei ah Myanmar ram nih democracy a hmuhnak ding le Myanmar mipi nih aa tluk tein an nuhrin covo an ngah khawhnak hnga, Nordic ram pawl nih kan dirkamh peng hna. Nuhrin covo dirkamh ruangah a nunnak liammi hna upat peknak le philhlonak caah tuni Nuhrin Covo Ni ah rose pangpar 1,300 kan chiah,” tiah a chim.
