Rung Lian Ceu cu a singkhaw tu Biak Hmun Sang nih zahan zaan ah, minutes 2 chungah a pehpeh in voi 2 bak a tengh i a tei.
Vawlei cung Laipa ṭhawngbik Biak Hmun Sang hmurka
Biak Hmun Sang nih a tei hnu ah, “Kei cu a ṭhawngbikmi ah kai ruah zungzal ko i Rung Lian Ceu ka tei thawngin kai ruahning aa dang hlei lo,” tiah a chim.
Rung Lian Ceu mi teinak kuat ‘vangkhen’ kong he pehtlai in Biak Hmun Sang nih hitin a chim.
“Kan chim hna lai, Laimi paih zohmi nih nan i fian ding cu ‘vangkhen’ lawng hi paih thiamnak asi lo. Kuat dang tampi a um ti hi rak thei uh,” ati.
“Paih thazaang a pemi vawlei cung Laimi vialte, cun keimah zong aa ka dawmi nan zate cungah kaa lawm tuk,” tiah paih zohtu le amah thapetu a fans pawl cungah lunglawmhnak bia a chim.
Rung Lian Ceu nih Biak Hmun Sang a singkhaw
Rung Lian Ceu nih, “Paih cu sungh phung, awn phung asi. Ka sungh ning hi kaa lungsi bak. Amah zong nih aa ka tei bak, tei bakin aa ka tei ko tutan cu,” tiah a sunghmi vuivai lo tein a cohlan.
Rung Lian Ceu bantukin zuamcawhtu le paih tuahtu upa le zohtu mipi upat tein sungh cohlan hi vawlei cung Laimi vialte nih kan i cawn awk asi. Malaysia Chinmi cu Chin Miphun Ni ah paih an rak tuah ve i a sungh cohlang duh lomi pawl khuacimui in an buai caah paih an rak leet thai i champion zong an um lo. Pasal a simi nih cun Rung Lian Ceu bantukin sungh tikah cohlan ding le hnu ah ṭhawng deuh in rat ṭhan ding asi.
Rung Lian Ceu nih, “Paih nan tuah ṭhan ahcun keimah bak nih singkhaw ṭhan ka duh. Paih nan tuah ṭhan ahcun keimah nih ka singkhaw,” tiah Biak Hmun Sang a singkhaw colh.
“Online in a rak zohmi ka fans pawl nan tha rak chia hlah uh. Hmailei ah mah nakin kai zuam deuh lai i ṭhawng deuh in ka rak ra ṭhan lai,” tiah thapetu mipi bia a tiam hna.
An i phomh ṭhan lai
Biak Hmun Sang nih, “Rung Lian Ceu nih aa ka singkhaw mi cu a ni caan kha rak khiak hmasa ulaw, mah kha cu Yes asi ko,” tiah i phomh ṭhan dingin a cohlan.
Tutan ah paih an tuahmi hi nunnak pekin Kawl Ralkap a dotu Chinland Defense Force (CDF) caah tangka an kawlpiakmi hna asi. ‘Ram le miphun caah pei asi cu tiin Biak Hmun Sang le Rung Lian Ceu nih anmah tangka bak $5,000 thap in an i pai. Biak Hmun Sang nih a tei caah Rung Lian Ceu nih $5,000 a liam lai i CDF caah an hlut dih lai. Tutan paih in a lutmi tangka vialte CDF caah an hlut dih lai.
CDF ca ṭhiamṭhiam ah paih an tuah ṭhan lai i Rung Lian Ceu le Biak Hmun Sang an i phomh ṭhan lai. A ni caan cu hnu deuh ah an khiahte lai.
